يتم التشغيل بواسطة Blogger.
RSS

عن الأحلام وعمايلها

اوعوا تكونوا فاكرين من العنوان أنا قصدى الأحلام اللى هى وإحنا نايمين دى
لالالا ابسلوتلى
أنا قصدى أحلام الطفوله البريئه المتعلقه بالمستقبل المجهول
الحمدلله يعنى انا متعوده من صغيرى على حاجه واحده
احلم زى ما انا عايزه
والله اعلم احلامي دي هتتحقق والا لا
اول احلامى دى مثلا او السؤال المعتاد من وانا صغيره
نفسك تطلعى ايه يا حلوه؟ انا مش نفسى اطلع حاجه محدده
ولا مٌدرسه زى ما الاطفال الطبيعين بيقولوا
بس لسه ماكنتش شايفه نفسى فى مكان محدد لانى ماكنتش اعرف قدراتى
اه عمليه انا من صغرى

المهم يعنى ان الناس دايماً كانوا شايفين انى شكله بيدى على دكتوره
مش عارفه شكل الدكاتره مميز بأيه بالظبط عشان يقولوا كده
بس واضح ان نضارتى حبيبتى كانت عامله شغل عالى اوى

لما وصلت لـ اخر ابتدائى كده كنت خلاص انا قررت عايزه اطلع ايه
بس ياريت ماحدش يضحك
احم احم
كان نفسى اطلع ظابط
انا قولت ماحدش يضحك
قصص رجل المستحيل كانت عامله شغلها معايا انا ذنبى ايه يعنى
يمين شمال كله يقنع فيا انه ماينفعش يا حبيبتى ماينفعش يا ماما
وانا ابداً على نغمه واحده شرطه يعنى شرطه
المهم وصلت لاعدادى
كان بدأ بقى ملف المستقبل وتخيلاته تعمل شغلها معايا
واتحولت اتجاهاتى الى كليه العلوم قسم ميكروبيلوجى
لا ومحدده القسم كمان
والله انا بنت مميزه ومختلفه من يومى :D
وفعلا كان ده اهم احلامى الواقعيه 
اللى ممكن بشويه مجهود زياده اقدر احققها
لحد ما دخلت اوله ثانوى واتفاجئت بالصدمه
اللى هى الفيزياء واللى عرفت من اول طله ليها كده
اننا عمرنا ما هنعرف نتفق مع بعض ولا يجمعنا كتاب واحد ابداً
فـ كان قرارى بتحويل اتجاهاتى مره اخرى
وده ظهر مع اول مقابله ليا مع كتاب الفلسفه الجميل ده
و كان حلمى التالى .. كليه الاداب قسم فلسفه
وده كمان كان حلم واقعى تماماً
الا ان اللى ما يتسمى التنسيق خلاه من التخيلات الغير محققه
فكانت نهايتى كليه الحقوق
وحسبى الله ونعم الوكيل فى اللى كان السبب
انا مش عارفه مين السبب
بس انا قولتها من قلبى اهو وربنا شاهد

السؤال اللى بيطرح نفسه بقى جوايا بقاله كتير
هو ياترى انا لو كنت دخلت اداب قسم فلسفه فعلا زى ما انا بحلم
كان ياترى حياتى و واقعى دلوقتى هيختلف فى ايه؟!؟


  • Digg
  • Del.icio.us
  • StumbleUpon
  • Reddit
  • RSS

2 التعليقات:

الكاتبة والإعلامية فاطمة العبيدي يقول...

كلنا هذا الرجل
كل واحد فينا خدته أحلام الطفولة والصبا والشباب لأماكن كتيييييييير اوي وفي الآخر كان نصيبنا في شيء عمرنا ما تخيلناه بس كان في الحقيقة الحلم اللي جوانا واحنا مش عارفين انه جوانا لأن الله سبحانه وتعالى أعلم بينا وبما يناسبنا ..

تحياتي

Bent Men ElZman Da !! يقول...

هو إحنا بنحلم
وفي النهاية ربنا بيحقق الأفضل لينا :)
نورتيني :))

إرسال تعليق