بالنسبة بقي لبيان الجيش
هو لية كل الناس أفتكرت إن الجيش هيرجع تاني يمسك البلد؟
أنا ماجاش في دماغي كده لسببين
السيسي واضح إنه غير طنطاوي
والجيش مش هيقع في نفس التشتيت ما بين حماية مصر من بره وألا من جوه !
بعيداً بقي عن حكاية ما إحنا كنا من كام شهر بنقول يسقط حكم العسكر
بس سؤال
مين ماحسش بعد البيان ده إن في أمل؟
أصل اللي كان هيحصل لو البيان ده ماتقالش
إن الشعب هيفضل يعارض وغيره يفضل مؤيد
ويبقي الحال كما هو عليه
علي إعتبار إن اللي مابيحسش هيفضل مايحسش زي ما هو يعني !!
إن الجيش دلوقتي يبقي خايف الشعب يموتّ في بعضه
و رئيس الدوله نفسه ولا هامه
شوية من المؤيدين يموتوا و أنا في الكرسي عادي
شوية من المعارضين يموتوا يبقي ياريت !
لا تخيل بقي إنك لما تطلع بعد 3 أيام من رفض شعبك ليك كأنك مبارك بالظبط
وتقول بردو مش ماشي وتطلعلنا لسانك
يبقي زى ما قولت من يومين إن اللي عنده دم أحسن من اللي عنده قصر إتحادية
وكمان كأن دي كانت رساله من الشيطان خلت الناس يضربوا في بعض !!
أنت متخيل يعني أيه تبقي شايل دم أنسان في رقبتك قدام ربنا؟!؟
الحلو في النهاردة بقي
أنا روحت الإتحاااااااادية ^_^
أيه يا جدعان الأحساس ده !
التنظيم والخوف علي كل بنت زيها زي أختك ويبقي في منطقة مخصصه للبنات الكل مايقدرش يقرب ناحيتها
وحماية كل المتظاهرين بروحك لما تعمل لجان شعبية عشان تأمنلهم الميدان
وإننا في وسط كل حاجة نبقي فاكرين الشهداء اللي راحوا واللي لحد اللحظة دي بيروحوا ونقرالهم الفاتحه أكتر من مره
إحنا شعب جميل أوي علي فكرة
والحماس وحب مصر فينا بالفطره مش حاجة مكتسبه
أحساس أنك تبقي واقف في وسط ملايين كلنا بنهتف "إرحل" أو "يارب"
لدرجة إنك ماتعرفش صوتك من صوت اللي جنبك
لدرجة إنك ماتعرفش صوتك من صوت اللي جنبك
في التحام في الأصوات والقلوب بطريقة مش طبيعية و ممتعه
فعلاً كانت مليونية إصرار عشان اللي يشوف الناس الجميلة دي
هيبقي متأكد وواثق إننا نقدر نوصل للي عايزينة
وجع قلبي أم الشهيد محمد الشافعي اللي اعتلت منصه الإتحادية
مسكت عيني إنها تبكي من الحماس
بس ماقدرتش أمسك نفسي قدام الست الجميلة دي
اللي لاقت جثه ابنها بعد شهر بتلف عليه
وهو ميت من بعد نزوله من البيت بساعه أصلاً
ربنا يزيد من صبرها هي وكل أم شهيد ياااارب
باقي من الزمن كام ساعه وبيتهيألي هيكون في تغير في مصيرنا كبير
اللهم إني أستودعك مصر
فأحفظها بحفظك يا من لا تضيع عنده الودائع
و أنت خير الحافظين
10 التعليقات:
إنتى صح
انا كمان حسيت ان في أمل
أمل في ربنا إنه دايما بيحفظ البلد دى
وأمل في الشعب اللى مش بينهزم
نهي
إحنا أصلاً عايشين بالأمل :))
صباح التفاؤل
كلامك طمنّى
يارب ينصرنا <3
اتفق معاكى جداااااااااااااا الكل بعد الخطاب متوقعين خلع الجيش لمرسى !!! ودا مش هيحصل بس اهم عشمنين فى اى معجزة تخلصهم منه ههههههه باقى البوست احب احقد عليكى واقولك يا بختك :) نفسى اكون فى كايرو علشان اكون وسطكم بجد ربنا يصبر ام الشهيد وكل شهيد دول نور الطريق هييييييييييييح قادر ربنا يحمى مصر ويحفظها اللعم امين
Fadwa Fouad
صباحك ومسائك أمل :)
ياااارب إن شاء الله <3
richardCatheart
هو بيتهيألي ده اللي إحنا متوقعينه و خصوصاً بعد خطاب إمبارح و إن الشعب كمان مش عايز أي تفاهم معاه
أنا بحقد علي نفسي أصلاً :)
إنزلي في أي ميدان قريب منك
هتحسي بنفس الروح
أصل الروح دي م مقتصره علي القاهره بس
دي في مصر كلها :)
اللهم آمين يارب
الله عليكي
يبقي زى ما قولت من يومين إن اللي عنده دم أحسن من اللي عنده قصر إتحادية
وكمان كأن دي كانت رساله من الشيطان خلت الناس يضربوا في بعض !!
أنت متخيل يعني أيه تبقي شايل دم أنسان في رقبتك قدام ربنا؟!؟
يابختك والله .. يعني بتغيظينا بقي .. تروحي الاتحاديه
وتشوفي الناس والميدان وتحسي بروح الميدان
بجد يابختك .. ربنا يحميكي :*
دمت صديقتي الرائعه
اللهم إني أستودعك مصر فأحفظها بحفظك يا من لا تضيع عنده الودائع و أنت خير الحافظين
heba atteya youssef
تسلمي حبيبتي :*
أصل أنا كنت مبسوطة إني أخيراً سبت حزب الكنبه :D
دمتِ صديقتي :))
Hanan w Haneen
إن شاء الله خير :)
إرسال تعليق