يتم التشغيل بواسطة Blogger.
RSS

صوت رمضان


 
جزء كبير من روح رمضان اللي بكتسبها من زمان بتبقي في صوته
وماكنش ينفع اسبوع الروحانيات يعدي من غير ما اتكلم عن صوت رمضان*
بيبدأ قلبي وعقلي يستوعبوا وروحي تشم روحه من قبله

البداية بتكون مع جمله " اليوم هو المتمم لشهر شعبان وغدا غرة رمضان 
اعاده الله علينا وعليكم باليُمن والبركات"
وتاليها علي طول اغنية مرحب شهر الصوم مرحب 
اللي بتخلي روحي تبتسم وتتنفس
هنا بحس إن رمضان بكرة بجد

في اول يوم صيام
بيبقي صوت كل آذان مختلف
وصوت قرأة القرآن أجمل
و قبل الفطار بنبقي مستنين درس الشعراوي 
اللي كان ماينفعش رمضان يعدي من غيره
و بعدين القرآن بصوت عبد الباسط عبد الصمد
وكمان الأبتهالات اللي كانها كانت بتخدر الواحد وتعيشه في عالم تاني 
وتخلي حياته أجمل 

صوت آذات المغرب تحديداً مختلف كل العائله بتبقي متجمعه وندعي في نفس واحد
وتبدأ الدوشة المحببه لكل قلب فينا
بعدها بيبدأ صوت تاني قريب من القلب اوي
صوت صلاة التراويح
صوت المؤذن وهو بيقيم الصلاة وبعدها صوته وهو أجمل لما بيقرأ القرآن
ولو ركزت اوقات هتلاقي صوت المصليين ورا وكأنهم في الخلفية بتسمع صوت دعائهم وترددهم "آمين"

رمضان مش بس شهر كريم
رمضان فيه تفاصيل كتير
بتخلي الحياة أجمل والروح أنقي




* البوست فكرته مستوحاه من مقال لـ د.أحمد خالد توفيق بأسم رمضان جانا
من كتاب  قهوة باليورانيوم


  • Digg
  • Del.icio.us
  • StumbleUpon
  • Reddit
  • RSS

2 التعليقات:

Nelly Aly يقول...

دايما بحس أن رمضان لي روح بتمشي بينا وهي اللي بتخلينا نحس بأن كل حاجة رجعت ليها روحها وعشان كدا بنفرح من قلبنا بجد!

جميلة يادينا:)

Bent Men ElZman Da !! يقول...

نيللي

إنتِ الأجمل يا نيللي :)

إرسال تعليق