من بداية الحملة كنت واخده عهد علي نفسي قبل ما يكون للمدونة
إن شاء الله هحاول علي اد ما اقدر ادون كل يوم مهما كانت الظروف
سواء ظروفي انا او ظروف البلد
وكنت متخيلة إن الحملة في حد ذاتها هتخليني اهرب من اللي حواليا بالكتابه
بس لما يكون التدوين الأسبوع ده تحديداً عن اللي بيحصل دلوقتي
واللي بيجي في نفس الوقت مع كمية الأحباط اللي جوايا
يبقي انا فعلاً ماعنديش حاجة اقولها !!
اصل سوري يعني .. يبقي اهبل اللي يقول انا فاهم كلللل اللي بيحصل
ماحدش فينا ينكر إن "بعض" الجيش ليه مواقف ماتتنسيش
زي محمد محمود وست البنات وحاجات تانية
وماحدش ابداً ابداً يقدر يقول إن الأخوان ملايكة وإن كل اعتصاماتهم سلمية
ويملكوا من الغباء القدر الكافي اللي يخليهم عملوا و بيعملوا وهيعملوا بلاوي سودا
بس لما بتلاقي شخص ميت قدامك او جنازة مابتسألش هو تبع مين؟!
قلبك بيتوجع من قبل ما تفكر هو كان بيعمل ايه عشان يموت !
وشهيد او مش شهيد دي لا أنا ولا أنت ولا أنتِ نقدر نحددها
ربنا وحده الأعلم بيها عشان هو الأعلم بالنوايا
في البداية كنت متابعه الأخبار لحظة بلحظة
حالياً انا بطلت اتفرج علي التليفزيون
عشان بدأت أحس إني علي مشارف الأكتئاب
اللي بيتزامن مع كل حدث بيحصل بيخلي نُصنا مش فاهمين والنص التاني بيموت !
وبطلت افتح الفيس كتير بسبب التصادم اللي بيحصل والكلام اللي بينرفز
بدخل اتفرج في صمت بخرج منه بـ لايك والا اتنين
وخدت عهد علي نفسي مش هاعمل شير لأي حاجة سواء حلوة أو وحشة
ما هو أكيد حالة التخبط اللي إحنا فيها هيجي وقت علينا ونخرج منها ونبدأ نستوعب
ده غير إن أزمة الثقة اللي عندي بتتفاقم
لأني بطلت اثق في أى كلام إلا لما أشوف بعيني
وحتي لما بشوف بعيني بيفضل جوايا شوية شك بردو
كل اللي قلبي وعقلي بيردده الفترة دي حاجة واحدة
اللهم أرنا الحق حقاً وارزقنا إبتاعه..وأرنا الباطل باطلاً وأرزقنا اجتنابه
