كل الحنين اللي حسيته في التدوينتين اللي فاتوا
النهاردة حساه الضعف
بالنسبالي الصداقة اللي هتكلم عنها النهاردة
مش صداقة مهمة وبس او لأنها استمرت 9 سنين علي عكس اللي فاتوا
لكن لأني كنت حساها وفاكراها صداقة العمر
اللي هتكمل معانا لما نعجز ونكبر وولادنا هما كمان يبقوا اصحاب
سارة .. عرفنا بعض في ثانوي في الأول مش تخيلت إننا هنكون اصحاب كده
بعد مع الوقت وبالتدريج بقت هي صاحبتي الوحيدة
وكل اسرارنا مع بعض وبالرغم إننا كنا دراستنا مختلفه بس كنا بنذاكر مع بعض
حتي لما دخلنا الكلية وكل واحد بقي في كلية مختلفه بردو كنا بنقعد نذاكر مع بعض
مانساش ابدا لما كنا بنظبط ساعتنا علي الساعه 7 انا وهي وواحدة صاحبتنا تانية
نروح عندها عشان نذاكر ومذاكرة بجد مش هزار .. ده مايمنعش إننا كنا بناخد شوية ترفيه في النص
بالرغم من إن كان طبعنا مختلف لحد كبير
لكن سارة كانت بتستحمل جناني اللي مش بيخلص
وعصبيتي اللي مالهاش اول من اخر
مانساش سهرنا مع بعض طول الليل نتفرج علي افلام رعب
اللي كنا نصها مش بنشوفها لأننا مغمضين عنينا
مانساش لما كنا بنسافر مع بعض المصيف
اللي ماعتقدش إني حسيت يعني ايه مصيف إلا مع سارة
مانساش وقت وفاة بابا
مانساش وقت وفاة بابا
لما هي كانت الأنسانة الوحيدة اللي وقفت جنبي وخففت عني كتيييير
وعمري في حياتي ما هنسالها الموقف ده
وكنت اتمني الوقت يدينا فرصه إني ارده ليها
مانساش اصحاب هي عرفتني عليهم
وماعتقدش إني كنت في حياتي هقابل ناس كويسة كده زيهم
مانساش مصايبنا اللي كنا بنعملها وجنانا وهزارنا
وخروجتنا اللي واثقة إنها عمرها ما تتعوض
ولما كنا بنخرج كل خروجة نطلع منها يجي بـ 70 صورة كدة
مش بس لتوثيق اللحظات اللي بتجمعنا
لكن كمان عشان إحنا كنا مبسوطين ببعض وبصداقتنا وبحياتنا المشتركة دي
وبسبب كده كنت الفترة الاخيرة بتجنب ابص لصورنا
لأن حنيني لأيامها بيوجعني
و انا ماتعودتش إن الحنين يوجعني ..بحبه يرسم ابتسامة علي وشي !
ولما كل اللي علي الجهاز اتمسح من ضمنه صورنا
حسيت إن حياتنا و صداقتنا مابقاش ليها واقع ملموس حتي لو للذكري !
ولحد دلوقتي كل ما بحاول افهم هو ايه اللي لغبط كل اللي جوانا كده
وياتري إحنا اصلاً وحشين و ألا الظروف اللي خلتنا من جوانا وحشين
بردو مابقدرش افهم ولا اوصل !!
4 التعليقات:
لأن حنيني لأيامها بيوجعني
و انا ماتعودتش إن الحنين يوجعني ..بحبه يرسم ابتسامة علي وشي !
جميلة التدوينة و من القلب
لكن الحنين لمن نفتقدهم يؤلم بل يعتصر قلوبنا ألما
دمتِ بخير
تحياتي:)
Hayat
الحنين لمن فقدناهم ونفتقدهم مؤلم
بس المهم إننا نخلي الألم ده مش يموتنا
يخلينا أكثر صلابة
دمتِ جميلة :)
yaaaaaaaaaaaaaaaa ya dina enty 3arfa el pics de ana ba3d atfrg 3leha t2rebn kol yom w amooot mn el d7k ayam mttnsesh f3ln w ya rab aymk dlw2ty bardo tb2a kolha sa3da
sarah
بيتهيألي الصور دي اصلا تحسيها بتخلي شريط حياتنا يعدي قدام عينيك لما تشوفيها
بس انا بحقد عليكي إن الصور دي لسه عندك :(
لو تعملي فيا معروف و تبعتهالي :D
ربنا يجعل ايامنا كلها سعادة انا وانتي يا سارة :))
إرسال تعليق