يتم التشغيل بواسطة Blogger.
RSS
‏إظهار الرسائل ذات التسميات نوستالجيا. إظهار كافة الرسائل
‏إظهار الرسائل ذات التسميات نوستالجيا. إظهار كافة الرسائل

رسالتي إليك


 
أتخذت اليوم قرار ان تكون تلك الرسالة إليك
لم أحدد صياغتها بعد وهذا ما سأكتشفه معك
لم أحدد إذا كانت لتوبيخك أم لمدحك 
أو حتي لأنهائك عن ملازمتك لقلبي كنبضاته أم لكل ذلك معاً
لقد فاض كيل روحي منك ...
بدأت كخيال أكتفي به ليعينني علي الأتي , ولكنك تماديت وأصبحت ليّ كظلي
ظل قاتم , حالك , مؤلم
ظل يشبهني حد التوحد داخل ذراتي
ذراتي التي تكونت يوماً منك
ففي كل يوم تُعيد بنائي
تعيد بناء تفاصيل حياتي ... ماضي وحاضر ومستقبل
يوماً تأخذ يدي نحو السماء السابعه .. سماء خالية من كل شئ سوانا
أنا .. أنت .. الذكري !
فترسم ملامح قلبي علي يديك فتزيدة إنتشاءً
و يوماً تنتزعني بسادية نحو تلك البقعة السوداء التي تتقن صنعها
فترسم ملامح معاناتي !
أكتفي أنا من الذكري
ولا تكتفي أنت بتعذيبي
أطالبك رجاءً غلق بابك نحوي ولا تطرقة يوماً وأعدك إنني أيضاً لن أفعل
سأحاول جاهدة ألا أذكر أسمك أو أنظر إلي تلك الصور التي تختبئ أنت في جوانبها
حتي لا تكتمل التعويذة و تأتي إليّ وحينها كعادتي لن أستطع أصرافك
سأضعك داخل ذلك الصندوق الأسود الذي يقطن في أحدي أركان خزانتي
وأحيطك بـ ورودي الذابلة وتلك الصور الباهته والكثير والكثير من الذكري
وأغلقة بمفتاح سأتخلي عنه بعيداً
ولم أنسي .. حتي لا تجرأ يدي علي لمسة سأكتب أسمك عليه بخط أسود كبير
"الحنين"
 

  • Digg
  • Del.icio.us
  • StumbleUpon
  • Reddit
  • RSS

آلم الفقد ..!





اخبرني يوماً في اول موضوع تعبير احاول كتابته
"ان الربيع يكسو الأرض برداء أخضر زاهي"
فـ كانت اولي لحظاتي في تعلم البلاغة منه


في تمام الساعة الخامسة يحين موعد الغداء
ويحين موعدي معه فـ يُجلَسني هو أمام شاشة التليفزيون
ويضع ذلك الشريط المميز لفيلمي الهندي المفضل حتي الآن
فأجلس ذاهله كعادتي ويستمر عرض الفيلم لـ اربع ساعات كاملة
أنام أنا في منتصفها ككل يوم
وأستيقظ علي صوت "شششش" معلناً إنتهاء الفيلم دون علمي
فيخبرني إنني نمت كما افعل كل يوم ويعدني بأعادة تشغيله لي غداً
ويأت غد و لا يمل هو في اعادة تشغل الفيلم لي
ولا أمل أنا من تجرع حنانه

****

كل يوم تتكرر جسلتنا العائلية الصغيرة التي تحتوي قلوبنا نحن الأربعة
تقترح أنت علينا ان نلعب لعبتنا المفضله
تلك اللعبه التي أعتقد أن لا أحد كان يلعبها سوانا
تُطرِبنا بصوتك  فـ تغني أحدي الأغنيات المجهولة بالنسبة لنا
وتُطالبنا بتخمين أسم من غناها
وإذا كانت إجابتنا صحيحه
تكون الجائزة جنيهاً في وقت كان فيه الجنية يعني الكثير

 وكلما زادت صعوبة الاغنية كلما زادت الجائزة
فتغششنا أمي الأجابة
لندخل في جدل بعدم احقيتنا للجائزه لأنها بالغش
وهكذا كل يوم
يوم نستطع أن نقتص منه الجائزة
ويوم نكتفي بالضحك كجائزتنا التي ستبقي للذكري 


"صندوق اللعب بتاعنا مليان باللعب
لما نفتحه قدامكم هتشوفوا العجب
في دبه وعروسة وكورة
واراجوز وكمان عصفورة"
أعتقد إنك كنت الوحيد (والوحيد عن حق) الذي يعلم أصل تلك الغنوة الطفولية 
التي يعلمها جميع أطفال العائلة منك وحدك!
كم كنت اتمني أن يسمعها اطفالي منك
ولكني سأستخلص حنيني إليك في كلمات وأخبرهم عنها وعنك يوماً ما




عن جدي وأبي اتحدث 
رحمهما الله 


 

  • Digg
  • Del.icio.us
  • StumbleUpon
  • Reddit
  • RSS

اصحاب من زمن فات (3)


 


كل الحنين اللي حسيته في التدوينتين اللي فاتوا
النهاردة حساه الضعف 
بالنسبالي الصداقة اللي هتكلم عنها النهاردة
مش صداقة مهمة وبس او لأنها استمرت 9 سنين علي عكس اللي فاتوا
لكن لأني كنت حساها وفاكراها صداقة العمر
اللي هتكمل معانا لما نعجز ونكبر وولادنا هما كمان يبقوا اصحاب 
سارة .. عرفنا بعض في ثانوي في الأول مش تخيلت إننا هنكون اصحاب كده
بعد مع الوقت وبالتدريج بقت هي صاحبتي الوحيدة
وكل اسرارنا مع بعض وبالرغم إننا كنا دراستنا مختلفه بس كنا بنذاكر مع بعض
حتي لما دخلنا الكلية وكل واحد بقي في كلية مختلفه بردو كنا بنقعد نذاكر مع بعض
مانساش ابدا لما كنا بنظبط ساعتنا علي الساعه 7 انا وهي وواحدة صاحبتنا تانية
نروح عندها عشان نذاكر ومذاكرة بجد مش هزار .. ده مايمنعش إننا كنا بناخد شوية ترفيه في النص
بالرغم من إن كان طبعنا مختلف لحد كبير 
لكن سارة كانت بتستحمل جناني اللي مش بيخلص
وعصبيتي اللي مالهاش اول من اخر

مانساش سهرنا مع بعض طول الليل نتفرج علي افلام رعب 
اللي كنا نصها مش بنشوفها لأننا مغمضين عنينا
مانساش لما كنا بنسافر مع بعض المصيف 
اللي ماعتقدش إني حسيت يعني ايه مصيف إلا مع سارة
مانساش وقت وفاة بابا 
لما هي كانت الأنسانة الوحيدة اللي وقفت جنبي وخففت عني كتيييير
وعمري في حياتي ما هنسالها الموقف ده 
وكنت اتمني الوقت يدينا فرصه إني ارده ليها
مانساش اصحاب هي عرفتني عليهم 
وماعتقدش إني كنت في حياتي هقابل ناس كويسة كده زيهم
مانساش مصايبنا اللي كنا بنعملها وجنانا وهزارنا 
وخروجتنا اللي واثقة إنها عمرها ما تتعوض
ولما كنا بنخرج كل خروجة نطلع منها يجي بـ 70 صورة كدة
مش بس لتوثيق اللحظات اللي بتجمعنا
لكن كمان عشان إحنا كنا مبسوطين ببعض وبصداقتنا وبحياتنا المشتركة دي
وبسبب كده كنت الفترة الاخيرة بتجنب ابص لصورنا
لأن حنيني لأيامها بيوجعني 
و انا ماتعودتش إن الحنين يوجعني ..بحبه يرسم ابتسامة علي وشي !
ولما كل اللي علي الجهاز اتمسح من ضمنه صورنا
حسيت إن حياتنا و صداقتنا مابقاش ليها واقع ملموس حتي لو للذكري !
ولحد دلوقتي كل ما بحاول افهم هو ايه اللي لغبط كل اللي جوانا كده 
وياتري إحنا اصلاً وحشين و ألا الظروف اللي خلتنا من جوانا وحشين
بردو مابقدرش افهم ولا اوصل !!


  • Digg
  • Del.icio.us
  • StumbleUpon
  • Reddit
  • RSS

اصحاب من زمن فات (2)




مروراً بسنين حياتي كان في أصدقاء كتير بيعدوا يسيبوا بصمه ولو صغيرة ويمشوا
اصدقاء المدرسة بالنسبالي مش كانوا الأقرب ليا في العادة
ولأني مش اتعودت يكون في ناس كتير قريبة مني وبتعرف اسراري
فـ قليل منهم اللي استمر في حياتي



في 3 ابتدائي نقلت مدرسة جديدة .. وقتها عرفت إيمان
كنا شبه بعض لدرجة اى حد كان بيفتكرنا قرايب 
وخصوصا إننا كنا ساكنين قريب من بعض
من كتر ارتباطنا ببعض اهلنا كمان بقوا اصحاب جدا حتي بعد ما إحنا بعدنا
إيمان كانت اول حد يخليني اهتم بالأفلام والمسلسلات الأجنبي
وهي اول حد دخلت معاه سينما في فيلم تيتانيك اللي كنا مجانين بيه وقتها
كنت بحب لما بنسهر مع بعض لحد الفجر عشان نبص بس للنجوم
اهتمامتنا كانت متشابهه جداً في كل حاجة تقريباً
وعشان كده كان حد مرة قالي علاقتكم كانت خضراء اوي
عجبني التعبير ده اللي رسم شكل علاقتنا اللي شبه الزهره قدام عيني
لما نقلت إيمان لمكان تاني حسيت بالغربة 
زي ما هي حسيتها في بيتهم الجديد بالظبط
وكان اللي بينا جوابات توصلها ماما ومامتها 
لعدم قدرتنا علي إننا كل يوم نزور بعض ولا نتكلم في التليفون
وكنا بنبعت هدايا لبعض حتي لو هبله اوي بس كنا دايماً بنفكر في بعض
ومع الوقت كل حاجة شغلتنا لدرجة إننا بطلنا خالص نبقي شبه بعض !
وبالتالي بدأت علاقتنا تقل لحد ما اختفت 
مش زعلانة علي ده ... بس زي ما قولت علاقتنا كانت صافيه اوي 
وخضراء اوي وفضلت كده
وعشان كده ماستحملتش تكمل وسط ظروف وتغيرات الحياة من حوالينا

بعدها ولما دخلت إعدادي بيتهيألي كان الموضوع صادم شوية
لأن المدرسة كانت كبيرة جداااا وانا مش متعودة علي المحيط الواسع من حواليا
لكن في اول سنة قابلت أمنية
مش فاكرة بقينا اصحاب ازاى
بس اللي فاكراه إنها بقت من أعز اصحابي
واستمرت صداقتنا في اعدادي وثانوي وكلية وإن كانت وقتها قَلِت كتير
كانت بتستحمل جناني بصراحة كتير وقليل لو كنا بنختلف في حاجة
بسبب دخول كل واحده فينا كلية مختلفه بقت مقابلاتنا قليله 
وتفاصيلنا اللي بنعرفها عن بعض مبتورة
لحد اخر مكالمة اللي فاكراها لحد دلوقتي
لما طلبت منها تيجي تقعد معايا في يوم هي وواحدة صاحبتنا تانيه
ومن وقتها وانا مش سمعت صوتها
نفسي اقابلها عشان اسالها هي بعدت ليه !!

وعشان مش عايزة بردو البوست يكون طويل اكتر من كده
مضطرة أكمل بكرة :)

  • Digg
  • Del.icio.us
  • StumbleUpon
  • Reddit
  • RSS

اصحاب من زمن فات :)


الحنين اللي جوانا لزمان
بيبقي فيه جزء كبير خاص بأصدقائنا اللي مروا علي سنين عمرنا
وعشان كده .. هتبقي تدوينة النهاردة



من وأنا صغيرة متعودة علي فقد أصدقاء
سواء بسبب تغير المدرسة
او بسبب تغير المكان
او حتي بسبب تغيرنا إحنا
لكن عمرى في حياتي مانسيت اسمائهم او شكلهم 
او العلاقة اللي كانت بتجمعني بيهم

اول علامة مميزة في حياتي
كانت وانا في 1 & 2  إبتدائي
آية وإحسان عبد الواحد
دول واخدين كادر خاص كده في حياتي لحد دلوقتي
بالرغم إنهم تؤام بس مختلفين في الطبع خالص
بيجمعهم الشكل اللي كان بيلغبطني فيهم كتير
بس دايماً كنت بحس إنهم اقرب لقلبي 
حتي لو كانت علاقتنا لم تتعدي سور المدرسة
ولما جت السنه اللي بعدها وانا غيرت المدرسة وسبتهم 
قررنا التليفون يبقي صلتنا الوحيدة
وفضلنا نتكلم سنين لحد ما اتغير رقم التليفون بتاعنا وبتاعهم وماقدرتش اوصلهم
لكن في يوم فجأه لاقتهم بيتصلوا هما بيا 
من كتر لغبطتي وفرحتي ماكنتش عارفه ارد اقولهم ايه 
وعرفت إنهم فضلوا يدوروا كتير لحد ما قدروا يوصلوا لرقمنا اللي اتغير
وحصلت بردو ظروف واتقطع مكالمتنا تاني
لحد ما وصلت لثانوي
في اوله ثانوي الفصول بتتقسم في مدرستنا حسب اللغه التانية اللي إحنا واخدنا
وانا كنت إيطالي والإيطالي كان فصلين او 3 بس تقريبا وكانوا في دور واحد
بالصدفه واقفه مستنية واحده صاحبتي قدام الفصل بتاعها 
وبتفرج علي قائمة الأسامي بتاعه الفصل
واتفاجي قدامي بأسم آية وإحسان 
ماصدقتش إنهم فعلاً من كتر ما أنا مش مستوعبه الصدفة
دخلت الفصل سألت صاحبتي هما فين شاورت عليهم
لاقتهم زي ما انا فاكراهم بالظبط 
نفس الملامح اللي كانت بتلغبطني ونفس روحهم الحلوة
اول ما شافوني كأنهم بيشبهوا عليا واول ما عرفوا إسمي اتاكدوا
 مهما اوصف سعادتي اد ايه إن الزمن والصدفه وصلتني بيهم تاني مش هاعرف
ورجعنا اصحاب طول الـ 3 سنين في ثانوي
وبعدها كالعادة الظروف فرقتنا بردو
نفسي صدفة زي اللي حصلت دي تجمعني بيهم تاني
نفسي اشوف في ملامحهم زمن فات أنا كنت بحبه اوي
نفسي اشوفهم عشان اشوف صداقتنا في ملامحهم اللي بحبها
نفسي اشوفهم لأنهم وحشوني أصلاً


مش عايزة البوست يكون طويل 
وعشان كده هاكمل بكرة :)




  • Digg
  • Del.icio.us
  • StumbleUpon
  • Reddit
  • RSS

نوستالجيا



و أنا أسير في طريقي 
رأيت هذا الغلاف الذي يتلون باللون الأبيض
والذي يحمل بداخله مذاق أياماً من فرط سعادتها تكفي عمراً كاملاً.
تسارع حنيني قبل يدي إلي ذلك الغلاف الذي يحمل عبق ما مضي من سعادتي 
أخذت أفض الغلاف كالمشتاقة الملهوفة لجرعة من الحنين تُعيد إلي أبتسامتي 
تلاقت يدى وملمسه المحبب إلي قلبي 
وتلامست شعيرات لسانى بطرفه 
فوجدتة قد أخذنى إلي تلك البوابة التى أعلم ملامحها جيداً .

أخرج أنا وكثير من الفتيات اللاتي يحملن من العمر ذات السنوات التى أحملها على ملامحي
نتسارع خارج البوابة الضخمة كالمسجونات 
اللأتي تم الأفراج عنهـن فى لحظة عفو نادراً ما تتكرر.
تخرج كل واحدة منهن فى إتجاه تنتظره منذ الصباح
ربما منزلها .. ربما أصدقائها .. ربما مكاناً أخر لا أعرفة 
ولكن أنا .. كنت أعرف مكاني جيداً 
تلك الزاوية الصغيرة هناك التى تحمل بعضاً من مسببات سعادتى
تلك الرقائق البيضاء التى تتوسطها بعضاً من تلك المادة الكريمية التى تذوب وتلتصق بأعلي فمي.

أما السبب الثاني للسعادة 
فـ كان تلك الغيمة القطنية التى يتقن ذلك الفتي صنعها ليّ 
اتناولها بـ حب فـ أخذ قضمة منها لأشعر بها تختفي داخلي 
ويبقي منها ذلك الشعور الذي أعشقة .

لأنتقل إلي تلك العربة التى يقوم ذلك العجوز بتحريكها بوهن 
لأطلب منه أن يناولني واحدة من تلك الأشواك 
فيختار لي واحدة تبدو شهية 
فيزيل عنها أشواكها ببراعة أتعجب لها ويناولني أياها
أتناول قطعة منها فـ أشعر بمذاق ذلك الحَب الذي يتسرب داخلها 
ومن ثَم داخل حلقي 
فـ أبتلعة و أستطعم حلاوتة التي أصحبت جزءً مني 
كان ذلك قبل أن تعود عينى إلي واقعي و أستكمل طريقي إلي عملي اليومي الممل 
الذي أصبح يُفقدني أصغر وأهم مسببات سعادتى .

  • Digg
  • Del.icio.us
  • StumbleUpon
  • Reddit
  • RSS

الحنين لزمن ما



لما أقترحت فكرة الأسبوع ده كان لسبب ما .. فماكنش ينفع ابدأ إلا بيه
عن إعلان بيبسي أتحدث
الأعلان اللي لخص طفولتنا في 5 دقايق


كل واحد من جيل الثمانينات و أول التسعينات
كان رد فعله حاجة من دول ...
ياما كان متنح من كتر الأنبهار
او منشكح من كتر السعادة
او عينة دمعت من كتر الحنين

الحنين في اللحظة دي مش لحاجات كانت تبهر من كتر الأتقان لالا خالص
وإلا ماكنش حد حَب بوجي وهو اصلا قرد
ولا حَب طمطم وهي اصلاً ارنبه والأدهي إن الأتنين اخوات !!!
ولا حَب النينجا لأنهم أصلاً سلاحف وعاملين فيها سوبر مان وكمان بيتكلموا !
الحنين في اللحظات دي بيبقي لعمر بحاله
حنين للسن اللي كنا فيه نملك من البراءة 
اللي يخلينا نتغاضي عن حاجات كتير مش معمولة صح
حنين لوقت كنا بنملك فيه راحة البال
حنين لحاجات اول ما بنشوفها بترجعنا لوقت في حياتنا 
إحنا كنا فيه لسه بنحب العالم من حوالينا
لأن العالم كان وقتها أنقي وأجمل و أكثر حقيقة من دلوقتي
والأهم حنين لنفسنا في الزمن ده

الوقت ده ارتبط في ذكرياتنا بكل الحاجات الطفولية اللي اتلخصت في 5 دقايق دي
بصراحة انا بشفق علي جيل الأطفال بتوع دلوقتي
للأسف مفيش عندهم ذكريات يكتسبوها حالياً لمستقبلهم زينا
لأن واقعهم بقي سريع وزحمة ودي هتبقي ذكرياتهم عن الطفولة
مش هيبقي عندهم ذكريات لما يشوفوها بعد سنين جسمهم يقشعر او عنيهم تدمع زي ما حصلنا كده
أما إحنا .. يا بختنا بذكرياتنا





علي الهامش
قصتي ضحكه قلب اللي كانت في اسبوع التدوين من وحي الصور
نُشرت النهاردة في جريدة الرأي


  • Digg
  • Del.icio.us
  • StumbleUpon
  • Reddit
  • RSS