زى ما قولت كان المفروض البوست ده يكون إمبارح
بس مبسوطة إنه أتاخر عشان يبقي بفرحه أجمل
إمبارح كان يوم ممتع بكل المقاييس
بالرغم من إني من حزب الكنبه قهراً للأسف :(
إلا أن كان جوايا لهفه اشوف كل حته في مصر عاملة ازاى
وكنت عماله اتنقل ما بين القنوات
وقلبي بينشكح كده من الميادين اللي مليانة ومش بيقولوا غير كلمة واحده "إرحل"
اللي اترسمت علي كل الوشوش حتي الأطفال
محمد كان بيقطع اللقطات المنورة دي وبيضلمها
ويجيب شوية قناه الحافظ ومصر 25 لأنه بيحب يسمع الرأي الأخر
فـ بعد شوية شلل من واحد بيقول دي مش معارضة ده في كل ميدان تلاته اربعه عملنا نفسنا مش سامعين
ومحمد مسك لسانة بالعافية وقلبنا القناه !
لما نزلنا بقي وبما إن المنطقة عندنا هادية جدااا والمعظم فيها ظباط جيش فـ مش كنت متوقعه أختلاف
بس لاقتهم بيعارضوا في صمت
وفي البلكونات علم مصر كبيييير
وفي اللي معلقين ورق كبير مكتوب عليها إرحل أو يسقط حكم المرشد أو الشعب يريد أسقاط النظام
لما خرجنا بره شوية ولأن ماكنش في عربيات بتروح التحرير
كانت كل المنطقة نازلين كل عائله قاعده في الشارع وبيهتفوا وماسكين علم مصر وكروت حمراء
كان في إبتسامة مش طبيعية في قلبي وعلي وشي
في الإتحادية كان كل العمارات اهلها طالعين في البلكونات حتي الأطفال
وبيهتفوا إرحل
من كتر إنبهاري بيهم نسيت أصورهم !!
أما في شارع شبرا
كان موضوع تاني خالص .. تقريبا مظاهره مستقله أصلاً وكأنها من ضمن الميادين
الصورة دي عبقرية
لا فعلاً المعارضة أقلية !!!!!!!!
لما بقي محمد نزل التحرير كل شوية أكلمه والاقي فرحة جميلة أوي في صوته
أول ما جه سألته أية الأخبار؟
قالي مفيش مشاكل ومفيش منصات عشان حد يوجه حد
وكأن كل واحد عارف هو بيعمل ايه وماشي ورا قلبه وبس
وبالنسبة للتحرش كان في شباب لابسين تيشيرتات مكتوب عليها ضد التحرش
وبيبعدوا أي ولد عن البنات
الكل كان خايف لما صحينا النهاردة ولاقينا الميدان أقل بكتير
بس أنا كان جوايا أمل كبير اوي وقولتلهم لا أكيد الناس هتنزل بليل تاني
وده اللي حصل
متخيلين يعني ايه المعارضة اللي نزلت اليومين دول
تكون أكبر من اللي نزلت ضد مبارك
وكأننا ماعرفناش يعني اية مظاهرات ومعارضة إلا دلوقتي !
طب أنت متخيل كرئيس إنك في سنة واحدة قدرت تكَوُن ليك معارضين يفوق عددهم ملايين اللي عارضوا النظام اللي قبلك طول الـ 30 سنة
ده إنجاز ياراجل !
فخوره جداً باللي حصل إمبارح والنهارده
و متفائله جداً بالأيام الجاية زى ما كنت دايماً متفائله
و متفائله جداً بالأيام الجاية زى ما كنت دايماً متفائله
عشان ماينفعش أكسر قلبي لما أسمحله يخاف ويكتئب
زى ما عملت في نفسي في ثورة يناير !!
لازم قلبي يعيش الفرحه بحق وحقيقي المرة دي
الشعب اللي زرع جذور الأمل جوه قلبه من 25 يناير 2011 قادر يكسر أي شوك يعوق نمو الشجرة دي !
وبعدين خايفين علي مصر ليه وربنا قال في كتابه الكريم
"أدخلوا مصر إن شاء الله آمنين"
يعني ربنا حاميها :)
أما بالنسبة لبيان الجيش
فـ ده كلام تاني بقي :)
15 التعليقات:
الله بجد
تدوينتك خليتنى أحس انى نزلت الميدان النهاردة
:D أبدعتى
ألا إن نصرالله قريب ..
حاسة في كلامك بسعادة بالغة :)
تحيا مصر يا دندن
وفي انتظار القادم :)
يااااااااااارب يا دينا تكون فرحتنا المرة بفايدة ومنرجعش من الصفر تانى
ربنا مع مصر وهى ان شاء الله محفوظة ربنا يبعد عنها اى شر
تحياتى الخاصة جدا ليكى:))
صباح ومساء مصر الحرية :) تصفييييييييييييييييييييييييييييييييييق حاد بوست اكثر من رائع بكتينى ربنا ينصر مصر ياااااااااااااااااااااااااااااااااارب
وكأن كل واحد عارف هو بيعمل ايه وماشي ورا قلبه وبس
اهم حاجة اننا نفضل ماشين ورا قلوبنا ومصدقين اللى بيحصل
الامل مهم جدا فعلا
:)
Noha Saleh
أنا نفسي أنزل بجد بقي :(
ربنا ينولهالنا كلنا ^_^
Dina
اللهم آمين يااااارب :)
Sara
فعلاً مبسوطة جدااا من اللي بيحصل
يارب تكمل علي خير :)
Amira Ahmed
أنا متفائله وحاسة إن المرة دي النتيجة خير إن شاء الله
المهم نفضل واثقين إننا قادرين نحقق حاجة
تحياتي ليكِ إنتِ حبيبتي :)
richardCatheart
اللهم آميييييييين يارب
مسائك فرحه ونصر قريب يارب :)
رحــــيـل
قلبنا والأمل والثقه دول اللي بيحركونا دلوقتي
إن شاء الله خير :)
أمانه عليك ياليل طول وهات العمر من الأول..بحب جديد وقلبي سعيد..ده تعليقي علي كلامك الرائع..يارب انصرنا يارب
ياسلاااااام عليكـِ يا نينو و إنتِ رايقة
اللهم آمين يااارب
ربنا يحفظ مصر واهلها :-)
إرسال تعليق