يتم التشغيل بواسطة Blogger.
RSS
‏إظهار الرسائل ذات التسميات روحانيات. إظهار كافة الرسائل
‏إظهار الرسائل ذات التسميات روحانيات. إظهار كافة الرسائل

أمنية روح




كل ما كانت جدتي بتبقي قاعدة قدام التليفزيون 
وتيجي صورة الكعبة قدامها
الاقيها ترفع إيديها وكأنها بتلمسها 
واشوف شفايفها وهي بتتحرك بالدعوة
فهمت بعد كده إنها بتدعي ربنا ينولها الحج

****

من سنين وأنا نفسي أعمل عمرة
لما بابا اتوفي الأمنية دي اصبحت بتلح عليا اكتر
عشان كان نفسي تكون العمرة ليه هو
الحمدالله ربنا رزقه بشخص ربنايركة عمله عمرة بأسمة
عقبالي ياااارب

****

"الف مبروك كسبت معانا عمرة"
الكلمة دي بتكرر كتير اليومين دول في البرامج
اسمع بعدها زغاريط او حد بيعيط من كتر الفرحة
دي مش مجرد كلمة أو جايزة
ده حلم تحقيقة بيخطف الروح



اللهم ارزقنا زيارة بيتك الحرام مع من نحب
اللهم آمين


  • Digg
  • Del.icio.us
  • StumbleUpon
  • Reddit
  • RSS

صوت رمضان


 
جزء كبير من روح رمضان اللي بكتسبها من زمان بتبقي في صوته
وماكنش ينفع اسبوع الروحانيات يعدي من غير ما اتكلم عن صوت رمضان*
بيبدأ قلبي وعقلي يستوعبوا وروحي تشم روحه من قبله

البداية بتكون مع جمله " اليوم هو المتمم لشهر شعبان وغدا غرة رمضان 
اعاده الله علينا وعليكم باليُمن والبركات"
وتاليها علي طول اغنية مرحب شهر الصوم مرحب 
اللي بتخلي روحي تبتسم وتتنفس
هنا بحس إن رمضان بكرة بجد

في اول يوم صيام
بيبقي صوت كل آذان مختلف
وصوت قرأة القرآن أجمل
و قبل الفطار بنبقي مستنين درس الشعراوي 
اللي كان ماينفعش رمضان يعدي من غيره
و بعدين القرآن بصوت عبد الباسط عبد الصمد
وكمان الأبتهالات اللي كانها كانت بتخدر الواحد وتعيشه في عالم تاني 
وتخلي حياته أجمل 

صوت آذات المغرب تحديداً مختلف كل العائله بتبقي متجمعه وندعي في نفس واحد
وتبدأ الدوشة المحببه لكل قلب فينا
بعدها بيبدأ صوت تاني قريب من القلب اوي
صوت صلاة التراويح
صوت المؤذن وهو بيقيم الصلاة وبعدها صوته وهو أجمل لما بيقرأ القرآن
ولو ركزت اوقات هتلاقي صوت المصليين ورا وكأنهم في الخلفية بتسمع صوت دعائهم وترددهم "آمين"

رمضان مش بس شهر كريم
رمضان فيه تفاصيل كتير
بتخلي الحياة أجمل والروح أنقي




* البوست فكرته مستوحاه من مقال لـ د.أحمد خالد توفيق بأسم رمضان جانا
من كتاب  قهوة باليورانيوم


  • Digg
  • Del.icio.us
  • StumbleUpon
  • Reddit
  • RSS

جربت مرة .. ؟




جربت مرة ..
وأنت بتسجد في الصلاة تستني شوية
وتدعي بكل اللي في قلبك فـ تكون واثق إن ربنا هيستجيب

جربت مرة ..
تسمع داعيه او شيخ وتقرر تاخد منه ولو نصيحة صغيرة
وتنفذها فعلاً في حياتك فـ تلاقي حياتك بقت احسن

جربت مرة ..
تسمع صوتك وأنت بتقرأ قرآن
فتحس إن صوتك بقي أجمل

جربت مرة ..
إنك ترفع إيدك للسماء وتدعي 
وعلي درجة سيل دعواتك هيبقي سيل دموعك

جربت مرة ..
تتخلي عن حاجة بتحبها اوي عشان ربنا
فـ تلاقي ربنا بيجازيك بحاجة أحسن منها بمراحل

  • Digg
  • Del.icio.us
  • StumbleUpon
  • Reddit
  • RSS

السعادة هي ..


 
السعادة هي ..
إنك تبص حواليك وتتأمل في كون ربنا ومخلوقاته
ومع كل نعمه من نعم ربنا بتشوفها حواليك وفيك
تلاقي قلبك وعقلك يردد 
"الحمدالله حتي يبلغ الحمد منتهاه"

السعادة هي ..
إنك برغم كل تقصيرك في عباداتك
إلا إنك تحس إن ربنا بيكافئك بأكتر من اللي بتتمناه
فـ تلاقي قلبك وعقلك يردد 
"اللهم إني أستغفرك و أتوب إليك"

السعادة هي ..
لما تتمني حاجات كتير وماتحصلش وتضايق
لكن بعدها ربنا يكافئك باللي أحسن منها
هتلاقي قلبك وعقلك بيردد 
"اللهم أختر ليّ ولا تخيرني فأنت خير من يختار"

السعادة هي ..
إنك لما تبقي في عز ضيقك
وتمسك كتاب الله بين إيدك
و تلاقي قلبك وعقلك بيردد 
" اللهم أجعل القرآن ربيع قلبي ونور صدري و جلاء أحزاني"

السعادة هي ..
إنك من جواك تبقي متصالح مع نفسك
وراضي بحالك و بالك مرتاح
هتلاقي قلبك وعقلك بيردد 
"اللهم أصلح حالي و أرض عني فقد ارضيتني"

السعادة هي ..
لما تشوف صورة الكعبة قدامك
تمد إيدك عشان تلمسها و تحسها ولو من الصورة
هتلاقي قلبك وعقلك بيردد
"اللهم أرزقني زيارة بيتك الحرام"

السعادة هي ..
لما يبقي قلبك مطمن و مش خايف من الموت
ولو خوفت
قلبك و عقلك هيردد
"اللهم احسن ختامنا وتوفنا وأنت راض عنا"

 

  • Digg
  • Del.icio.us
  • StumbleUpon
  • Reddit
  • RSS

رُكن جوه الروح



 من فترة وأنا نفسي اعملي رُكن للعبادة
احط فية المصلية بتاعتي والأسدال و المصحف و الأمساكية
في البداية حطيت المصلية والاسدال مكان ما بصلي
بس اللي ماقدرتش اثبتهم في مكان
المصحف و الأمساكية و خاتم التسبيح
لأقتني باخدهم معايا مكان ما بروح
سواء بره البيت او في اى مكان بقعد فيه في البيت
بحب احساسي وهما جنبي ولو حد شالهم بقعد ادور عليهم
عشان كده ماكنش ينفع اثبتهم في مكان



أهم حاجة بالنسبالي في ده كله
مصحفي الصغير ده
المصحف  ده معايا بقاله اكتر من 10 سنين
لما جدي مات كان في دولابه فـ خدته انا
ومن وقتها مابعرفش اقرأ في مصحف إلا هو برغم خطه الصغير
بس دايماً بيربط دماغي بصورة جدي 
لما كان بيقعد يقرأ في المصحف قبل المغرب في اوضته
وانا اقف علي باب الأوضه افضل ابص عليه 
واسمع صوته اللي كان جميل اوي لما بيقرأ القرآن
صوته وريحته اللي لسه في المصحف برغم السنين
والعلامات اللي كان حاطتها علي بعض الآيات
كل ده بيخليني احس بروحانيه العُزله اللي كان بيقعد فيها وهو بيقرأ القرآن
وكأن نفسي روحي تكتسب من روح عزلته شوية :)


  • Digg
  • Del.icio.us
  • StumbleUpon
  • Reddit
  • RSS

إنعش قلبك :)



"إنعش قلبك وعقلك بذكر الله"
ده كان أسم رمضان بالنسبه لينا السنة اللي فاتت
نيللي علي .. كانت هي قائده الحملة دي 
واللي أنا متأكده إنها خدت فينا ثواب كبير اووووي لما شجعتنا عشان نبدأها
الفكرة بدأت لما هي أقترحت علينا إننا نكون مجموعة واحدة كلنا بنات 
و نرتب عبادتنا مع بعض
قراءة قرآن و سماعه وتفسيره و الأذكار 
والأستغفار والتسبيح و تفسير حديث وقيام الليل
أو حتي البرامج الدينية اللي بنتفرج عليها
جدول كل يوم كنت بحاول علي اد ما اقدر امشي عليه
برغم إن وقتها كان وقت قاتل في حياتي وماكنتش فاضيه لأي حاجة 
بسبب التجهيز لفرحي
بس كأن ربنا بعتلي نيللي عشان تخليني مش اتوه
وعشان تفكرني إن كلنا مع بعض وبمساعدتنا لبعض هنقدر
ولما بنكتب تقرير كل يوم ونلاقي نفسنا مقصرين 
بنشجع بعض إننا بكره نبقي أحسن
ده غير إننا كنا بنعرف معلومات جديده من بعض 
لما حد مثلاً بينزل تفسير حديث مش نعرفه
أو بتحديد الأحاديث الضعيفه مثلاً
حاجات كتير أوي كانت بتخليني من جوايا في هدوء أنا كنت حباه اوي
وأعتقد إن دي من اكتر الأوقات اللي قريبه من قلبي 
و كنت بتمني نكررها السنادي كمان 



(حاولت ادور كتير علي البيدج بتاعتنا اللي كنا بنكتب فيها تقرير كل يوم 
بس للأسف مش لاقتها)

  • Digg
  • Del.icio.us
  • StumbleUpon
  • Reddit
  • RSS