الحنين اللي جوانا لزمان
بيبقي فيه جزء كبير خاص بأصدقائنا اللي مروا علي سنين عمرنا
وعشان كده .. هتبقي تدوينة النهاردة
من وأنا صغيرة متعودة علي فقد أصدقاء
سواء بسبب تغير المدرسة
او بسبب تغير المكان
او حتي بسبب تغيرنا إحنا
لكن عمرى في حياتي مانسيت اسمائهم او شكلهم
او العلاقة اللي كانت بتجمعني بيهم
اول علامة مميزة في حياتي
كانت وانا في 1 & 2 إبتدائي
آية وإحسان عبد الواحد
دول واخدين كادر خاص كده في حياتي لحد دلوقتي
بالرغم إنهم تؤام بس مختلفين في الطبع خالص
بيجمعهم الشكل اللي كان بيلغبطني فيهم كتير
بس دايماً كنت بحس إنهم اقرب لقلبي
حتي لو كانت علاقتنا لم تتعدي سور المدرسة
ولما جت السنه اللي بعدها وانا غيرت المدرسة وسبتهم
قررنا التليفون يبقي صلتنا الوحيدة
وفضلنا نتكلم سنين لحد ما اتغير رقم التليفون بتاعنا وبتاعهم وماقدرتش اوصلهم
لكن في يوم فجأه لاقتهم بيتصلوا هما بيا
من كتر لغبطتي وفرحتي ماكنتش عارفه ارد اقولهم ايه
وعرفت إنهم فضلوا يدوروا كتير لحد ما قدروا يوصلوا لرقمنا اللي اتغير
وحصلت بردو ظروف واتقطع مكالمتنا تاني
لحد ما وصلت لثانوي
في اوله ثانوي الفصول بتتقسم في مدرستنا حسب اللغه التانية اللي إحنا واخدنا
وانا كنت إيطالي والإيطالي كان فصلين او 3 بس تقريبا وكانوا في دور واحد
بالصدفه واقفه مستنية واحده صاحبتي قدام الفصل بتاعها
وبتفرج علي قائمة الأسامي بتاعه الفصل
واتفاجي قدامي بأسم آية وإحسان
ماصدقتش إنهم فعلاً من كتر ما أنا مش مستوعبه الصدفة
دخلت الفصل سألت صاحبتي هما فين شاورت عليهم
لاقتهم زي ما انا فاكراهم بالظبط
نفس الملامح اللي كانت بتلغبطني ونفس روحهم الحلوة
اول ما شافوني كأنهم بيشبهوا عليا واول ما عرفوا إسمي اتاكدوا
مهما اوصف سعادتي اد ايه إن الزمن والصدفه وصلتني بيهم تاني مش هاعرف
ورجعنا اصحاب طول الـ 3 سنين في ثانوي
وبعدها كالعادة الظروف فرقتنا بردو
نفسي صدفة زي اللي حصلت دي تجمعني بيهم تاني
نفسي اشوف في ملامحهم زمن فات أنا كنت بحبه اوي
نفسي اشوفهم عشان اشوف صداقتنا في ملامحهم اللي بحبها
نفسي اشوفهم لأنهم وحشوني أصلاً
مش عايزة البوست يكون طويل
وعشان كده هاكمل بكرة :)
6 التعليقات:
aked bost gamed w byfkrna bzkryaat kteer 7lwa
mbsota awe w ana bshofk mn nga7 l nga7
rbna ywf2k
sarah
أحلى ما في الماضي صداقة المدرسة
تحياتي
sarah eldahan
ذكرياتنا الكتير الحلوة لسه التدوينه بتاعتها جاية ;)
ربنا يخليكي يا سارة
انا مبسوطة إنك هنا جدااا :))
ويارب مش تكون اخر مرة ^_^
الكاتبة والإعلامية فاطمة العبيدي
الماضي اللي بيصنع اجمل ما فيه هي صحبة الأصدقاء :)
اسعدتيني بوجودك
فعلا الصداقة الصافية احسن حاجة فى الكون ..
يارب تقدري توصليلهم تانى ان شاء الله ويجوا يقرأوا كلامك عنهم كمان :-)
Hanan w Haneen
صداقة الطفولة دي كانت صداقة من غير مصالح
صداقة عشان إحنا بنحب بعض وبس
مش مستنين من بعض حاجة ولا واقفين لبعض علي الواحدة
يارب يقدروا يقرأو كلامي ده عنهم في يوم من الأيام :)
إرسال تعليق