يتم التشغيل بواسطة Blogger.
RSS

عن شيرين سامي :)


كنت دايماً بقولك إنك أثرتي فيا بطريقة إنتِ نفسك مش تعرفيها
ولذلك وجب إن يكون ليكِ تدوينة خاصة أقولك إنتِ أثرتي فيا إزاى :)

لما عرفت مدونتك في حملة التدوين من سنتين تقريباً
كان في حاجة في كلامك دايماً بتخطفني
كنت بحس إنك بتحطي كل احساسك وتفكيرك في كل تدوينة بتكتبيها
لما عرفت إنك هتنزلي كتاب كنت مبسوطة عشانك جدااااا
واول ما روحت معرض الكتاب كان كتابك هو أول حاجة راحت إيدي عليها
وبقيت ببص ليه وانا مبسوطة إنك قدرتي تحققي حلمك 
وإني ماسكه كتاب عليه اسمك
وبقيت أقول لصاحبتي علي فاكرة أنا أعرفها ^^

قرأت الكتاب واللي كنت مستمتعه بيه جداً
عشان لاقيت جواه روحك وأسلوبك اللي دايماً كنت بحسه في تدويناتك
بيتهيألي كتابك كان السبب 
في إني أرجع احط كتاب جنبي و أنا نايمة علي المخدة
عشان أقراه قبل ما أنام ولو قلقت بليل

كنت لما بمسك كتابك 
بتخيل إنتِ فضلتي إزاي ورا حلمك ده عشان تحققية
وده كان البداية اللي خلت حلمي أنا كمان يتكون 
عشان يدخل في حيز التحقيق

أحب أعترفلك أعتراف مهم جداً كمان
حفله توقيع كتابك كانت هي أول حفلة توقيع لكتاب أحضرها في حياتي
ماكنش عندي القدرة إني اروح لكاتب 
واحضرله حفلة وادخل وسط الزحمة وكل ده
يمكن الخجل كان كتير بيمنعني 
وهو نفس الخجل اللي خلاني يوم حفلة التوقيع بتاعتك
اسلم عليكِ واخد توقيعك وأهرب :)
بس كنت مستمتعه بالزحمة اللي حواليكِ وابتسامتك وفرحتك
وفرحتك دي اللي كانت بتشجعني أكتر
ومن وقتها وانا عرفت منك يعني أيه أحط إيدي علي حلمي وأفضل وراه
أياً كان الحلم ده أيه و أياً كانت الظروف اللي بتواجهه أيه

عشان كده لما بيكون عندك إحباط من حاجة في مجال الكتابة
بحس إن الأحباط ده بيجيلي أنا كمان
وكأني بستمد طاقة منك في الموضوع ده تحديداً


كان لازم أكتبلك البوست ده من أول ما فكرت في كتابي اللي إنتِ سبب فيه
بس كنت دايماً مش بقدر اوصفلك إزاي إنتِ أثرتِ في حياتي


شيرين... لازم أقولك شكراً بحجم الكون :)

  • Digg
  • Del.icio.us
  • StumbleUpon
  • Reddit
  • RSS

5 التعليقات:

Emtiaz Zourob يقول...

الله ..

الله عليك وعلى شيرين .. أنا بحبكم قوي قوي قوي قوي .. بحب شيرين جداً وفرحت بكتابها وفرحت أكثر لما وصلني لغزة هدية منها ومسكته بإيدي ، غلافه الحلو جدا وكلامها الرقيق جوا ،، وحبيتها أكثر لما شفت صورتها ، " شكلها قريب من القلب وضحكتها بتجنن " وكنت مبسوطة وسعيدة زيك ، اني بعرفها ، لا مش بس بعرفها لا انا بتكلم معاها وبتواصل وبحس انها صاحبتي حتى لو من بعيد ..

وكنت بأتمنى أني احقق حلمي زيها وانشر كتاب لي في حملة النشر لمن يستحق ،، صحيح هي سبقتنا بس الحمدلله بقينا زملاء لها ^^

أما أنت يا دينا ، فأنا بحبك جدا من قبل ما اعرف اسمك .. كنت اكتفي بـ " بنت من الزمن ده " واحب ادخل عندك في مدونتك حتى لو ما تركتش تعليق بس كنت بقرأ تدويناتك باستمرار ، وانبسط جدا لما تعرفت عليك وقربت منك بعد ما بقينا زملاء في حملة النشر لمن يستحق وعرفت اسمك وشكلك ، وقد ايه انت شخصية جميلة ورقيقة .. وبحلم برضه اني اقرأ كتابك " قصاصات أنثوية " ويارب يتحقق حلمي قريب ..

واحب اقولك انت كمان شكرا بحجم الكون لمشاعرك النبيلة وحبك لأصدقائك والاعتراف بوجودهم في حياتك وتأثيرهم ..

مع كل الحب ,,

Bent Men ElZman Da !! يقول...

وجع البنفسج

و أنا بحبك جدااا يا إمتياز من غير حتي ما أشوفك ولا نتقابل .. وإنتِ شخصية نقية جداً وبتتعاملي ببساطة وحب أوي

شيرين أصلاً جميلة وكل اللي بيتكلم معاها بيحبها :)

كنت أتمني بجد إني أقدر أبعتلك كتاب وحاولت مع الدار بس مش عارفه حصلهم ايه
ياااااريت لو تعرفي طريقة أبعتلك بيها الكتاب تبلغيني بيها أرجوكِ

وشكراً ليكِ إنتِ علي كلامك الجميل زيك اللي مليان حب :))

Unknown يقول...

يا نهار أبيض :)
كلامك إنتي و إمتياز...أنا خلاص بعيط بجد
أنا كمان بحبكم جداااا و ربنا عالم
الناس النقية بتبان و مفيش حجاب بين القلوب لما بتحب بجد..ربنا يديم بينا المحبة و تزيد و يمكن ربنا يحققلنا أمنية جميلة إننا نلتقي عن قريب,
أنا إتشرفت بمعرفتكم و زدت سعادة بمشاعركم

:*)

Bent Men ElZman Da !! يقول...

بعد الشر عنك من العياط يا شيرين :)
ربنا يديم المحبة في قلوبنا كلنا ويجمعنا علي خير يااارب إن شاء الله <3
وأنا مبسوطة إني أعرف حد جميل اووي من جوه ومن بره زيك كده

Emtiaz Zourob يقول...

ربنا يديم المحبة يا رب ، ويجمعنا في يوم من الأيام .. <3

إرسال تعليق