رسالة لـ نفسي في المستقبل
الفكرة عجباني من وقت ما رضوي كتبت عنها هنا
الفكرة إني لما أكتب رسالة لنفسي و أرجع اقراها تاني
أحس إن أنا زي ما أنا مابقتش وحشة تأثراً بحاجات كتير بقابلها حواليا
يارب بعد 10 سنين فاتوا من وقت الرسالة دي
تكوني حققتي حاجات كتير بتتمنيها
اتمني تكوني زي ما إنتِ متفائلة برغم كل حاجة بتخنق وتضايق حواليكِ
ولا تكوني أتغيرتِ من كمية السخافات اللي بتشوفيها و الأشخاص اللزجة اللي بتمر في حياتك
واللي كنتِ بتمسحيلهم أوقات كتير إنهم يضايقوكِ ويأثروا عليكِ
خليكِ فاكرة إن أي حد ضايقك إنتِ اللي سمحتيله بكده !
خليكِ صريحة زي ما أنتِ أوعي تفكري تخافِ من صراحتك دي
حتي لو عملتلك مشاكل
أوعي تسمحي للي حواليكِ إنهم يتحكموا في مصيرك ويجبروكِ إنك تعملي حاجات إنتِ مش عايزاها !
عشان اللي إنتِ مقتنعة بيه مش لازم كل اللي حواليكِ يشوفوه صح
لأن تفكيرهم مش زي تفكيرك ولا أحساسهم زي أحساسك
عايزه تفضل اهتماماتك زي ما هي
لسه بتحبي تكتبي وتقرأي و تحلمي وتجري ورا أحلامك دي
لسه بتحبي اللون البمبي و لسه بتحبي توم أند جيري
لسه بتحلمي تنشري كتاب واتنين وعشرة
والبيت عمره ما يشغلك عن كيانك و تحقيق أحلامك
لسه بتسرحي حتي لو قاعدة بين ملايين ومن سرحانك ده بتطلعي بقرار أو قصه جديدة تكتبيها
لسه عايشه جوه القوقعة بتاعتك اللي بتحميكِ من الصدمة في اللي حواليكِ
وهي نفسها اللي بتخليكِ قادرة تتحكمي في علاقتك بأي حد تعرفيه
عشان تحكمك في علاقاتك ده اللي هيخليكِ تفضلي حاطه حدود لنفسك ماتسمحيش لحد يعديها
عشان حياتك وتفاصيلك ملكك لوحدك ماينفعش حد يدّخل فيها
ماتسمحيش لحد إنه يضايقك أو يجبرك علي حاجة إنتِ مش عايزاها
ماتبطليش تسمعي فضل شاكر لمجرد إنه بقي إرهابي زي ما بيقولوا
أصل إنتِ بتاخدي من صوته أحساسه مش معتقداته !
ماتبطليش تسمعي أغاني ماحدش يعرفها حتي لو الكل قالك إنها غريبه !
ماتبطليش تحبي الأفلام والمسلسلات الأجنبي والرعب والخيال العلمي
ماتبطليش تقرأي رجل المستحيل وملف المستقبل وماوراء الطبيعة
عشان ده جزء من اللي فاضل من طفولتك
ماتبطليش تحني لكل حاجة غريبة وقديمة لمجرد إنها بتفكرك بزمان
عشان ده كل اللي باقي من اللي فات !!
ماتبطليش تحبي الصور عشان هي اللي بتخليكِ تشوفي حياة إنتِ مش عايشاها
خليكِ بتحبي محمد زي ما أنتِ
أوعي تخلي أي ظروف أو مشاكل تأثر علي علاقتكم
و الأهم إنك تبطلي عصبيه بقي شوية
لو ربنا رزقك بأطفال خليكِ دايماً حاطة قدام عينك إن كل تصرف وصفه هيكتسبوها هتبقي منك عشان كده لازم تكوني أد المسئولية دي
خليكِ ام كويسة ليهم و خليهم يعيشوا في جو أسري يكونوا مستريحين نفسياً فيه
خليهم يبقوا فخورين بيكِ عشان إنتِ كمان تكوني فخورة بيهم
2 التعليقات:
- الناس السخيفة اللي بنقابلهم في حياتنا ..دايما بقول لو أنتي مش مميزة مكنوش سخفوا..يعني الإنسان لو ملوش كيان هيرخموا عليه ليه, ماهما كل اللي مضيقهم إنك غير..وميت خط علي كلمة ( غير)..ولما متعرفيش تتعملي معهم ده مش عشان أنتي ضعيفة..لأ ببساطة لأنك قاموسك ميعرفش الحاجات دي فبتالي بيقف صامت أدام السخافات!!
- أوعي تتغيري وتتنزلي عن أحلامك وخصوصا بين ناس مبتعترفش بمهنة الكتابة, يعني تعالي قولي لحد أنا بكتب ولا هيعيرك أي أهتمام ده ثقافة مجتمع أتربي علي أن القراءة والكتابة عشان تنجح يا حبيبي في المدرسة وبعد ما تنجح في آخر يوم في الامتحانات أرمي الكتب في الزبالة..فأوعي تتأثريي باللي حوليكِ..أعمل زيه أكتب وطوز أن أعترف بيكي الآخرين وله لأ..المهم يكون لكي كيانك اللي تفتخري بيه..أوعي تبقي ( عادي) زي زاب ثروت لما غني.
- كتبك وكتاباتك هي ميراثك في الحياة!!
- العزلة يا دينا..تأكدي لم نلجأ ليها إلا هروبا من الآلام وإهمال الأخرين لينا..لأن في اللمة فرحة..لكن فين اللمة زي ما بيغنيها العسيلي دلوقتي..مفيش!!
- أوعي تخلي حد يمشيلك حياتك..هيحاولوا علي فكرة بس المهم تتمسكي والأهم إنك تعرفي إنك لازم هيحصل تصادم..عشان أحنا اتربينا أن مينفعش يبقي لينا حياتنا اللي نعيشها..لازم الكبار هم اللي يمشونا علي مزاجهم عشان ده احترام وهم صح..كلام فارغ!!
- فضل شاكر وكتبك رجل المستحيل والكرتون هم دول اللي هيخلوكي تستحملي الحياة..من غيرهم الحياة هتبقي ميتة!!
- العصبية لازم تهدي يادينا الأطفال بيتأثروا بيها جدا..وأول حد بينضر هو أنتي وكمان الرجالة مش بتحب ده بيشوفوا أهانة..حاولي كدا مش هتروح بس هتقل..هي عاوزه تحكم وتفكير..أسألي واحدة عصبية بقت دلوقتي مش عصبية أوي!!
- وأخيرا الإنسان المميز دايما أغانيه وكتاباته بتبقي غريبة علي الناس عشان زي ما قولتلك هو غير!!
دينا..عاوز أقولك أن من الحاجات المضحكة لما حد بيعرف أني بكتب يقولي هو أنتي بتكتبي طيب عشان أبقي أعمل لايك..لا يك دي من باب المجاملة يعني..وعادي بقول معلش معلش..خليها تقول:)
-بس في ناس سخيفة بتبقي سخيفة لمجرد الأستمتاع مش أكتر وده أسلوب حياه بالنسبة ليهم .. لكن اللي بيسخفوا عشان انا غير زي ما بتقول دول بضحك قدامهم الضحكة السمجة دي :D
-بقيت فعلاً متأكدة إن العيب مش فينا نهائي .. العيب في تفكير مشوه لمجتمع غبي اتربي تربيه مشتته
-الفرحة نقدر نخلقها حتي لو في العزله .. الفرحة دي مبدأ لو أنا عندي القدرة الكفاية اللي تخليني أفرح !
-حكاية حد يتحكم في حياتي حساها جداً الفترة دي لدرجة إنها طابقة علي نفسي ومش قادرة أتنفس منها .. يمكن ده اللي مخليني مُحبطة ومكتئبة !!
-مانكرش إن العصبيه بتضيع حاجات كتير اوي وعشان كده نفسي ابقي زيك وأقدر أقللها شوية
-إحنا التميز ذات نفسه يا نيللي :D
- وأخيراً أحب أنا اقولك المضحك أكتر بقي .. أول ما نشرت كتاب وفي شخصيات ما يعني عرفوا أول حاجة سألوني
وهتاخدي كام بقي؟؟ .. مهما أوصفلك كم الأحباط وقتها مش هاقدر
ماحولتش أتناقش معاهم لأن اللي يسأل سؤال زي ده عمره ما هيفهم إحنا بنكتب ليه
لأنهم عمرهم ماهيفهموا إن الكتابه مكسب مش محتاج بعده أى مكسب تاني !!
مش عارفة أقولك ايه علي اهتمامك وإنك تكتبي تعليق كده يا نيللي :)
إرسال تعليق