صباحك ورد معطر بروحك الجميلة :)
عارفة يا نيللي .. الرسالة دي عايزة اكتبهالك من وقت ما تكتبتيلي البوست ده
هتصدقيني لو قولتلك ماكنتش عارفة أقولك كلام يكفي اللي كتبته ؟!
بس لما بقي الأسبوع ده التدوين من وحي تدوينة ما
إنتِ أول حد جه في بالي
وقررت أفتح البلوج واللي هيجي في دماغي هاكتبه
فـ اعزريني لو ماقدرتش أوفيلك حقك :)
دايماً بتخيلك في عالم خاص بيكِ أوي
بتخيل تفاصيلك اللي شوفتها مرة واحدة من سنة ونص !!
ابتسامتك .. كلامك .. تعبيرات وشك
بحس إن كل حاجة بتعملها أو بتكون حواليكِ فيها تفاصيله منك ومن روحك
بتخيل شكل بيتك شبهك أوي هادي وبسيط ويدخل القلب زيك بالظبط
بتخيل مكتبك اللي بتقعدي تكتبي عليه وتفاصيلك اللي بشوفها في صورك
فاكرة أول مرة شوفتك لما كنت منبهره بيكِ
عارفة الأنبهار ده ليه؟
عشان كنت حاسة إن أنا اللي بتكلم مش إنتِ
لما قولتي إنك بتحبِ يكون في حدود اللي حواليكِ معاكِ ماينفعش يعدوها
وإنك حتي جيرانك ليها حدود بينك وبينهم
حبك للقراءة والكتابة الخالص من أى حاجة إلا الأستمتاع
وحتي تفاصيل من حياتك شبه حياتي
وحاجات كتير أوي قولتيها ماكنتش متخيله إن حد هيكون بيتبعها في حياته غيرى ! بما إن أنا حاسة إني غريبة شوية يعني
خلتيني أحس إن التصرفات الغريبة اللي بعملها دي من مبادئي وحياتي اللي بحبها
واللي ماينفعش أسمح لحد إنه يغيرها مهما حصل
خلتيني أحس إن لازم أفضل أحافظ علي الحدود اللي بحطها بيني وبين الناس زي ما أنا
وده نفس اللي خلاني في أوقات بكون مضايقة أوي بتكوني من أول الناس إن ماكنتيش أول حد بالفعل أفكر فيه
عشان بحس إني لما أقولك حاجة هابقي بتكلم مع نفسي
من كتر ما أنا شايفة إننا شبه بعض أوي
حتي شبه بعض في نوع الشيكولاته اللي بنحبها والنسكافية ^^
بعد لقائنا الأول واللي لحد دلوقتي الأخير .. كان عندي أمل إني أقابلك تاني
والحمدالله لسه الأمل مش راح يعني :)
رغم كل الظروف والقلق اللي بيحصلنا كل ما بنحدد نتقابل
وبالرغم من إن المدة ما بين لقائنا ودلوقتي طويلة أوي
وبالرغم من إن مكالماتنا أحيان كتير بتبقي قليلة
بس مين قال إن القرب بالكلام واللقاءات؟!!
طول عمري مقتنعه أن القرب بالروح والقلب قبل أي حاجة
في كتير ناس بتبقي قريبة منك لكن مش بتكون قريبة من قلبك والعكس كمان
لما قولتيلي إنك بتستمدي مني الأصرار إني أوصل للي أنا عايزاة
ماكنتيش عارفة أبداً إن أنا اللي بستمد منك حاجات كتير اوووي يا نيللي
بستمد منك القوة .. ايوة لما بضعف في مواقف بعينها بفتكرك
ومهما قابلت ناس سخيفة في طريق حياتي بعمل مش واخده بالي عشان أقدر أكمل
بستمد منك الأمل .. إن مهما كان حصلنا حاجات تضايق لازم نعديها
بستمد منك التفاؤل .. إن مهما أحلامنا واللي بنتمناه أتاخر مصيره هيجيلنا طالما إنه من نصيبنا
بحب فيكِ إنك دايماً متفائلة أوي بالناس
وده نفس اللي بيخليكِ تتصدمي فيهم بسرعة
يمكن دي الحاجة الوحيدة اللي بطلنا نكون شبه بعض فيها
عشان أنا بطلت اتفاءل بالناس
وبالتالي بطلت اتصدم !
لسه بحلم معاكِ باليوم اللي هنتقابل فيه سواء في أي مكان
أو حتي في البيت عشان نقف في المطبخ مع بعض :)
ووقتها هابقي جايبالك كيت كات و نسكافية كتير عشان يكفينا
والأكل اللي هنعمله حتي لو وحش هناكله بردو
ونقعد نكتب حاجة مع بعض وناخد رأي بعض فيها
إنتِ الأولي اللي كنت بفتكرها في دعائي من أصحابي
وبتمنالك نفس اللي بتمناه لنفسي
بتمني ربنا يرزقك بـ يوسف ونور ويكونوا أحسن مما بتتمني كمان
بحمد ربنا إن في وسط ناس كتير أوي عرفتهم وعدوا من حياتي سابوا علامة كويسة أو وحشة
كنتِ إنتِ من الناس اللي سايبة ولسه وهتفضل بتسيب علامة مهمة في حياتي ♥
