يتم التشغيل بواسطة Blogger.
RSS

نجمة واحدة



كلما كانت معه كانوا يبحثوا معًا عن النجمة الواحدة
النجمة التى تضئ السماء لتسرق ببريقها باقى الحضور
وعندما يجداها يقضيان ليلهم فى النظر إليها و الأبتسام و...الحب
أما حين تركها ورحل
كلما حاولت البحث عن ذات النجمة لم تجدها
وكأنه حين رحل سرق معه نجمتهما 
وترك سماء حياتها كئيبة.. مظلمة.. دون أمل !



  • Digg
  • Del.icio.us
  • StumbleUpon
  • Reddit
  • RSS

كتاب "كلام والسلام " .. كلاكيت كل مرة

 
أول مرة نزلت كلام والسلام كان شخصي اوي
بتكلم عن مواقف من حياتي وبس
لكن مع الوقت كلام والسلام بالنسبة ليا بقي مختلف تماماً
بقيت بتكلم عن أحاسيس كتير بتمر جوايا في مواقف بعينها
بقيت بشوف احساس ناس كتير مش بعرف اطلعه غير في كلام والسلام
وممكن و أنا قاعدة في وسط ناس كتييير وحصل موقف يخلق ف دماغي فكرة لكلام والسلام
بتناسي اللي حواليا ولازم أكتب الجُملة اللي جت في دماغي
واللي فاجئني إني مع كل تدوينة لكلام والسلام
كنت بلاقيكم بتقولولي إن نفس الكلام حصل معاكم أو مريتوا بالأحساس ده مثلاً
أو إن ده الطبيعي واللي كلنا واجب نحسه علي مدار حياتنا أصلاً

جه في دماغي ..ليه مش أجمع كلام والسلام في كتاب ؟
وخصوصاً بعد ما لاقيت ناس كتير بتاخده علي الفيس من غير اسم
وفي نفس الوقت اللي كنت بفكر فيه
لاقيت كومنت من رنا "مش ناوية تنزلي كلام والسلام في كتاب"
قولتلها وكأنك بتفكري نفس تفكيري :)
وكمان بعدها الاقي بنوته بعتالي إنها مهتمة جداً بكلام والسلام تحديداً
ونفسها أكتب عن احساسها في تدوينة منهم
ومن وقتها و أنا الموضوع في دماغي
بس لما فكرت لاقيت إن ماينفعش الكتاب يكون ورقي
لأنه أولاً بالعامية و أنا ماعنديش أستعداد أطبع كتاب بالعامية
وثانياً لأن حجمة صغير 
و أقرب للقلب من إنه يكون مطبوع وبعيد عن أي حد يحب يقرأه
فـ كان القرار إنه ينزل إلكتروني
 

كنت كسولة شوية عقبال ما خلصته
و تعب محمد معايا و زنه عليا إنه أعمله
وتعب الصديق مصطفي الكردي اللي ساعدني في إن الكتاب يكون بالشكل ده :)
و أول حاجة بقي تشجيعكم إنتم وتعليقاتك علي تدوينة كلام والسلام تحديداً
و مانساش نور لما كانت بتقولي أنا بستني التدوينة دي بالذات
بشكركم علي دعمكم ليا اللي في أحيان كتير بتعملوه من غير ما تحسوا :)
وشكراً لـ أي شخص قابلته وكان بينا موقف خلق جوايا فكرة كتبتها في كلام والسلام

اتمني تقرأوا الكتاب وأعرف رأيكم فيه
لأن رأيكم دايماً بيهمني :)

تقدروا تحملوا الكتاب من هنا

  • Digg
  • Del.icio.us
  • StumbleUpon
  • Reddit
  • RSS

.. ! ..




أقف بثبات وشموخ عند نهاية الجُملة أُزينها
وقفتي تبدو عكس ما يدور بداخلي
أشعر بالتيه و السراب
تيه يجعلني مشتت لا أفهم ما يسبقني
سراب يحتويني ويُحيط بي
أحاول الفهم ولا أستطيع
أوُقِف التفكير
و أبقي صامتةٍ
وأكتفي بتزين نهاية بضع جُمل
تاركةٍ الفهم لمن يريد



  • Digg
  • Del.icio.us
  • StumbleUpon
  • Reddit
  • RSS

عن شيرين سامي :)


كنت دايماً بقولك إنك أثرتي فيا بطريقة إنتِ نفسك مش تعرفيها
ولذلك وجب إن يكون ليكِ تدوينة خاصة أقولك إنتِ أثرتي فيا إزاى :)

لما عرفت مدونتك في حملة التدوين من سنتين تقريباً
كان في حاجة في كلامك دايماً بتخطفني
كنت بحس إنك بتحطي كل احساسك وتفكيرك في كل تدوينة بتكتبيها
لما عرفت إنك هتنزلي كتاب كنت مبسوطة عشانك جدااااا
واول ما روحت معرض الكتاب كان كتابك هو أول حاجة راحت إيدي عليها
وبقيت ببص ليه وانا مبسوطة إنك قدرتي تحققي حلمك 
وإني ماسكه كتاب عليه اسمك
وبقيت أقول لصاحبتي علي فاكرة أنا أعرفها ^^

قرأت الكتاب واللي كنت مستمتعه بيه جداً
عشان لاقيت جواه روحك وأسلوبك اللي دايماً كنت بحسه في تدويناتك
بيتهيألي كتابك كان السبب 
في إني أرجع احط كتاب جنبي و أنا نايمة علي المخدة
عشان أقراه قبل ما أنام ولو قلقت بليل

كنت لما بمسك كتابك 
بتخيل إنتِ فضلتي إزاي ورا حلمك ده عشان تحققية
وده كان البداية اللي خلت حلمي أنا كمان يتكون 
عشان يدخل في حيز التحقيق

أحب أعترفلك أعتراف مهم جداً كمان
حفله توقيع كتابك كانت هي أول حفلة توقيع لكتاب أحضرها في حياتي
ماكنش عندي القدرة إني اروح لكاتب 
واحضرله حفلة وادخل وسط الزحمة وكل ده
يمكن الخجل كان كتير بيمنعني 
وهو نفس الخجل اللي خلاني يوم حفلة التوقيع بتاعتك
اسلم عليكِ واخد توقيعك وأهرب :)
بس كنت مستمتعه بالزحمة اللي حواليكِ وابتسامتك وفرحتك
وفرحتك دي اللي كانت بتشجعني أكتر
ومن وقتها وانا عرفت منك يعني أيه أحط إيدي علي حلمي وأفضل وراه
أياً كان الحلم ده أيه و أياً كانت الظروف اللي بتواجهه أيه

عشان كده لما بيكون عندك إحباط من حاجة في مجال الكتابة
بحس إن الأحباط ده بيجيلي أنا كمان
وكأني بستمد طاقة منك في الموضوع ده تحديداً


كان لازم أكتبلك البوست ده من أول ما فكرت في كتابي اللي إنتِ سبب فيه
بس كنت دايماً مش بقدر اوصفلك إزاي إنتِ أثرتِ في حياتي


شيرين... لازم أقولك شكراً بحجم الكون :)

  • Digg
  • Del.icio.us
  • StumbleUpon
  • Reddit
  • RSS

عنك ♥


التدوينة دي كانت المفروض اكتبها من أول الأسبوع ده تحديداً
لأنه بيتكلم عن الشخصيات اللي أثرت في حياتي
وأنت من أهم الشخصيات اللي أثرت وشقلبت حياتي للأحسن
 الكلام ده مش من اول ما حبينا بعض ولا لما اتخطبنا ولا لما اتجوزنا
ده من زمااان اوي



فاكره أول مرة كلمتك خالص
لما كان بيجمعنا منتدي واحد واللي عن طريقه عرفتك
كنت بتكلمني عشان تقولي إني هاكون مشرفه علي قسم في المنتدي ده
و لما أختارت قسم صغير وشغله بسيط
قولتلي لا إنتِ شغلك أحسن من كده بكتير
و أختارت أنت قسم تاني أكبر وشغلة أكتر و أنا وافقت من غير ما اقولك حاجة
وبعدها القسم ده بقي من أهم و أكبر الأقسام في المنتدي 
وللأخر فضل الوحيد تقريباً اللي شغال
وانا كنت بحبه حب مش طبيعي 
وكأنه القوقعة بتاعتي اللي لما بدخل علي النت بفضل قاعدة فيها ومستمتعه
ده كان تأثير مهم أوي عندي كان خلي شكل حياتي وقتها ممتع أكتر
بس ماكنتش مركزة إنك سبب في التأثير ده

فاكره لما كلمتك بعد كده
وأكتشفنا إننا في كلية واحدة وفي نفس السنة
وأنت طلبت مني أجي أحضر دروس معاك لأنها هتفيدني
رغم إني وقتها ماكنتش مقتنعه خالص بحكاية الدروس في الكلية
بس قولت لما أجرب
وبيتهيألي الدروس دي كانت من أهم الأسباب اللي خلتني أعدي سنين الكلية اللي كانت باقية
و بردو وقتها ماكنتش لسة مستوعبة إنك بتأثر في حياتي

فاكره لما قابلتك أنا وولاد خالتي
و طلبت بنت خالتي منك تذكرة مترو عشان لما ترجع بلدها تفتكر أي حاجة في مصر
و انت فعلاً جبتلها واحدة وكتبتلها عليها كمان
وقتها عرفت إنك مش بتأثر فيا أنا بس 
لكن كمان بتأثر في اللي حواليا

فاكره لما بدأت مكالماتك وسؤالك عليا في التليفون يزيد
وقتها كنت بتأثر في يومي وشكل حياتي اللي بدأت تقلبها خالص
من هنا بدأت أخد بالي أنت اد اية بتأثر فيا

لما جيت واتقدمتلي و اتخطبنا و بدأنا نجهز شقتنا ولما اتجوزنا
كل دي كانت تأثيرات بتمر عليا لأول مرة
وبتحسسني بفرحة ماكنتش حسيتها ولا حتي فكرت فيها قبل كده

لما قولتلك عايزة أنزل كتاب وقولتلي طبعاً موافق وأنا معاكِ
من هنا بدأت تأثر في حلمي
وكل اللي عملته ليا بعد كده كان عشان تخليني أقدر أوصل لكل اللي بحلم بيه
وكأنك ماسك بوصلة احلامي وبتوجهها لمكانها الصح

ربنا كان كاتبلنا كل حاجة من غير ما ناخد بالنا إننا في الأخر لبعض


  • Digg
  • Del.icio.us
  • StumbleUpon
  • Reddit
  • RSS

عن أمي ♥


بما إن الأسبوع ده التدوين عن شخصيات أثروا في حياتنا
فـ طبيعي إن أول حد يجي في بالي كان "ماما"



ماما هي أول شخصية أثرت فيا وكونت شخصيتي
فيا كتير اوي اوي منها
عصبيتها وصوتها و قراراتها اللي في الغالب مش بتتراجع عنها
طريقة تعاملها مع الناس و صراحتها و انطباعها الأول عن الناس 
اللي في الغالب بيكون صح
من وأنا صغيرة كنت دايماً بشوف إني مش شبهها في أي حاجة
بس مع الوقت بقيت أحس إني ماكنتش فاهمة أى حاجة خالص

حنيتها و إنها عايزة تجيب لي حته من السماء خلاني أعرف يعني أيه امومه
قربها مني و تعاملها معايا علي إني صاحبتها مش بنتها
كل ده كان يوم عن يوم بيكسر حواجز كتير ممكن تكون موجوده بين أي أم وبنتها
مابقتش العلاقة واخده الشكل ده 
اد ما هي واخده شكل إننا بنتشاور في كل حاجة
وبالتالي بقت هي صاحبتي الأولي إن ماكنتش الوحيدة أصلاً

حبي للقراءة جه منها في البداية
بيتهيألي لو ماكنتش بتشجعني ماكنتش هيبقي حبي للقراءة بالشكل ده دلوقتي
لو ماكنتش بتشجعني علي حاجات كتير اوي في حياتي ماكنتش هاوصل لكل حاجة بعملها دلوقتي
لو كانت شخصيتي فيها حاجة كويسه فـ هي منها

ربنا يخليكِ ليا  ♥

  • Digg
  • Del.icio.us
  • StumbleUpon
  • Reddit
  • RSS

إشتياق ..


لما قرأت تدوينة ضياء النهاردة
خلي فكرة الأشتياق نفسها بكل اللي فيها تسيطر عليا

 
الأشتياق مش بس حبيب وحبيبته
الأشتياق اللي وصلني و حسيته و دايماً بحسه 
بيبقي لكل حاجة حواليا كانت موجودة وراحت
الأشتياق لـ لحظات أنت عارف إنها مش هتكرر تاني
ولو أتكررت مش هتبقي بنفس الجمال والروح
أشتياق لأشخاص كانوا في حياتك ومابقوش موجودين لأسباب كتير
وارد أنت نفسك ماتكنش تعرفها
أشتياق لمشاعر معينه 
حنان..حب..سعادة..أمومة.. وغيرها كتير
أشتياق لمشاعر حسيت بيها في يوم وبعدين راحت من جواك
أشتياق لمشاعر عمرك ما حسيتها في يوم بس نفسك اوي تحس بيها
الأشتياق فكرة و أحساس مزروع جوانا
لما بيجي موقف عشان يظهره تلاقيه فجأه بقي مالي حياتك
ولما بتحاول تخبيه بتحس كأن في شوكه جواك عماله تغرز في قلبك أكتر و أكتر
لحد ما تجبرك إنك تبوح وتقول واحشني كذا... واحشني فلان...
عشان ده الأحساس اللي مهما خبيته عن الناس 
هتفضل عايش وحاسس بيه

  • Digg
  • Del.icio.us
  • StumbleUpon
  • Reddit
  • RSS

إحتواء

"هذا الرجل الذي فتح كل أبوابه لهمومها    
هذا الرجل الذي يئن صدره مع أناتها 
هذا الرجل الوحيد الذي يأبه لدموعها 
هذا الرجل الذي ترتاح لمجرد سماع صمته 
هذا الرجل الذي تمتد ذراعه عبر الأثير لتمسح على رأسها بحنان 
هذا الرجل الذي يُمشط شعرها بأصابع عشقه 
هذا الرجل الوحيد الذي يستطيع أن يستخلص ضحكتها من بين الدموع 
هذا الرجل الوحيد الذي يرى ضعفها قوة 
هذا الرجل الذي لا يمنعه إعتزازه بنفسه أن يعترف بخطأه 
هذا الرجل الذي يتسع صدره لغضب إمرأة كما يتسع لعشقها 
هذا الرجل الذي لا يتضرر من إمرأة شاكية باكية تُعكر صفو أنانيته 
هذا الرجل الذي يشعرها أنه دائماً...هنا..من أجلها"

من تدوينة إحتواءك لـ شيرين سامي

وقفت كتير أوي قدام الجزء ده
لمس قلبي جداً
وماكنش ينفع يعدي من غير ما اتكلم من وحي التدوينة دي



 أي بنت مننا طول عمرها بتفكر في فارس الأحلام اللي هتقابله
مش عشان ياخدها ويطير والكلام اللي وارد يكون مش منطقي شوية
بس أهم حاجة بتفكر فيها إن وقتها الحياة هتبقي أجمل
لأن كل متقابلك مشكلة هتلاقيه جنبك
كل ما تخافِ هو هيطمنك
كل ما تحلمي هيشجعك تحققي حلمك
كل ما تزعلي هتلاقيه بيطبطب عليكِ
والأهم من كل ده إنه هيحتويكِ
هتكوني جواه زي ما هو هيكون جواكِ
الأحتواء يعني حنان تحسيه من نظرة قبل ما تحسيه من لمسه أيد أو حُضن
 الأحتواء إنه يخليكِ مش محتاجة لأي حد طول ما هو جنبك
الأحتواء إنه عمره يسيبك في إنتِ محتاجاه فيه حتي لو كان زعلان منك
الرجل اللي بيملك من الأحتواء المعني ده
يستحق فعلاً أن يُعشق

"هذا الرجل
 يستحق أن يُعشق ألف مره

فقليلون هم من يستطيعوا أن يُشعِروا إمرأة بالمعنى الحقيقي للإحتواء..حتى و إن كانوا هم سبب الألم.."
شيرين سامي



  • Digg
  • Del.icio.us
  • StumbleUpon
  • Reddit
  • RSS

لمسه تمحي الخوف !



اسوء شعور بيسيطر علينا طول حياتنا هو الخوف"
الخوف من زوال متع الدنيا من بين ايدينا وده اللى بيخلينا نعصى ربنا
الخوف من الماضى والذكريات اللى بيخلينا أوقات نفكر فى حاجات بتوجعنا
الخوف من بكره واللى بيخلينا نقعد طول حياتنا نخططله
الخوف من فقد شئ مهم فى حياتنا 
وده اللى بيخلينا نحافظ عليه -احيانًا- لدرجه الخنقه
بس اسوء انواع الخوف
هو الخوف اللى بيخليك ماتعرفش تكون سعيد 
بحاجه المفروض إنها تفرحك أوى

اللهم أمحى من قلوبنا الخوف إلا الخوف منك يارب"



الخوف من اسوء المشاعر اللي بتمر علينا
لما بتخاف من حاجات كتير في حياتك
سواء كنت تعرفها أو حتي مش عارف تعبر عنها
بتحس وقتها إنك محتاج أى حاجة أو أي حد يطمنك
محتاج قٌرب حد منك يقولك أنا جنبك ماتخافش
حد يمسك أيدك ويطبطب عليها كانه بيطبطب علي قلبك
محتاج حٌضن يطمنك يقولك أنت مش لوحدك
عشان كده أكتر الأشخاص اللي بنكتسب منهم الأمان من زمان
هما أول الأشخاص اللي كنا بنقرب منهم لما كنا بنخاف
أول شخص خدك في حضنه وقت خوفك 
أول شخص لمس أيدك وقالك ماتخافش
هو نفسه أول شخص هتفضل طول عمرك شايف إنه مصدر أمانك


من وحي تدوينة


  • Digg
  • Del.icio.us
  • StumbleUpon
  • Reddit
  • RSS

نسيان..!




من كام سنة فاتوا كنت سألت سؤال في منتدي
تعمل أية لو صحيت في يوم لاقيت نفسك فاقد الذاكرة !
أكيد كله قال إنه أحساس وحش اوي
بس كفاية إن هيكون في ناس حوالينا تفكرنا
بس الأسوء كان لو أنت لوحدك هيكون أية الحل !!
لما شوفت تدوينة خوله أمبارح
 الموضوع رجع لذاكرتي من تاني

خوله ذكرت الموضوع عن المرضي بالزهايمر
المرض ده تحديد كان شاغلني من فتره قريبة
وخصوصاً إني سمعت عن شخصيات حواليا عندهم المرض ده
وأد ايه حياتهم أصبحت مأسوية !
شخص بينسي حياته بالتدريج
في الأول بيبدأ ينسي تفاصيل صغيرة
وبعدين التفاصيل بتزيد واللي بيتنسي بقي أكتر
ومع الوقت أنت بترجع طفل من تاني وبتحتاج حد يعتني بيك
بتكون مش فاكر أي حاجة وكل حاجة !!

تخيل لما أنت بتقابل شخص بالصدفه وتلاقيك مش فاكرة
بتحاول تفتكر وتحاول وتحاول وتضايق لو ماعرفتش
طيب تخيل كده لو أنت في يوم ماقدرتش تفتكر أقرب و أهم الناس ليك !!
تخيل لما بتنسي تفصيلة معينه مهمه في حياتك
أو صورة خدتها في وقت جميل من حياتك ونسيت كان أمتا
بتبقي مضايق أوي إنك ازاى تنسي وقت مميز من حياتك كده 
طيب تخيل بقي لو أنت في يوم ماقدرتش تفتكر أى حاجة في حياتك !!
الموضوع مؤلم جداًُ جداً

اللهم عافنا وأعفو عنا


  • Digg
  • Del.icio.us
  • StumbleUpon
  • Reddit
  • RSS

رسالتي المستقبلية !


رسالة لـ نفسي في المستقبل
الفكرة عجباني من وقت ما رضوي كتبت عنها هنا

الفكرة إني لما أكتب رسالة لنفسي و أرجع اقراها تاني
أحس إن أنا زي ما أنا مابقتش وحشة تأثراً بحاجات كتير بقابلها حواليا


يارب بعد 10 سنين فاتوا من وقت الرسالة دي
تكوني حققتي حاجات كتير بتتمنيها
اتمني تكوني زي ما إنتِ متفائلة برغم كل حاجة بتخنق وتضايق حواليكِ
ولا تكوني أتغيرتِ من كمية السخافات اللي بتشوفيها و الأشخاص اللزجة اللي بتمر في حياتك
واللي كنتِ بتمسحيلهم أوقات كتير إنهم يضايقوكِ ويأثروا عليكِ
خليكِ فاكرة إن أي حد ضايقك إنتِ اللي سمحتيله بكده !

خليكِ صريحة زي ما أنتِ أوعي تفكري تخافِ من صراحتك دي 
حتي لو عملتلك مشاكل
أوعي تسمحي للي حواليكِ إنهم يتحكموا في مصيرك ويجبروكِ إنك تعملي حاجات إنتِ مش عايزاها !
عشان اللي إنتِ مقتنعة بيه مش لازم كل اللي حواليكِ يشوفوه صح
لأن تفكيرهم مش زي تفكيرك ولا أحساسهم زي أحساسك

عايزه تفضل اهتماماتك زي ما هي
لسه بتحبي تكتبي وتقرأي و تحلمي وتجري ورا أحلامك دي
لسه بتحبي اللون البمبي و لسه بتحبي توم أند جيري
لسه بتحلمي تنشري كتاب واتنين وعشرة 
والبيت عمره ما يشغلك عن كيانك و تحقيق أحلامك
لسه بتسرحي حتي لو قاعدة بين ملايين ومن سرحانك ده بتطلعي بقرار أو قصه جديدة تكتبيها
لسه عايشه جوه القوقعة بتاعتك اللي بتحميكِ من الصدمة في اللي حواليكِ 
وهي نفسها اللي بتخليكِ قادرة تتحكمي في علاقتك بأي حد تعرفيه
عشان تحكمك في علاقاتك ده اللي هيخليكِ تفضلي حاطه حدود لنفسك ماتسمحيش لحد يعديها
عشان حياتك وتفاصيلك ملكك لوحدك ماينفعش حد يدّخل فيها

ماتسمحيش لحد إنه يضايقك أو يجبرك علي حاجة إنتِ مش عايزاها
ماتبطليش تسمعي فضل شاكر لمجرد إنه بقي إرهابي زي ما بيقولوا
أصل إنتِ بتاخدي من صوته أحساسه مش معتقداته !
ماتبطليش تسمعي أغاني ماحدش يعرفها حتي لو الكل قالك إنها غريبه !
ماتبطليش تحبي الأفلام والمسلسلات الأجنبي والرعب والخيال العلمي
ماتبطليش تقرأي رجل المستحيل وملف المستقبل وماوراء الطبيعة 
عشان ده جزء من اللي فاضل من طفولتك
ماتبطليش تحني لكل حاجة غريبة وقديمة  لمجرد إنها بتفكرك بزمان
عشان ده كل اللي باقي من اللي فات !!
ماتبطليش تحبي الصور عشان هي اللي بتخليكِ تشوفي حياة إنتِ مش عايشاها

خليكِ بتحبي محمد زي ما أنتِ 
أوعي تخلي أي ظروف أو مشاكل تأثر علي علاقتكم
و الأهم إنك تبطلي عصبيه بقي شوية
 
لو ربنا رزقك بأطفال خليكِ دايماً حاطة قدام عينك إن كل تصرف وصفه هيكتسبوها هتبقي منك عشان كده لازم تكوني أد المسئولية دي
خليكِ ام كويسة ليهم و خليهم يعيشوا في جو أسري يكونوا مستريحين نفسياً فيه
خليهم يبقوا فخورين بيكِ عشان إنتِ كمان تكوني فخورة بيهم


  • Digg
  • Del.icio.us
  • StumbleUpon
  • Reddit
  • RSS

إلي نيللي




صباحك ورد معطر بروحك الجميلة :)

عارفة يا نيللي .. الرسالة دي عايزة اكتبهالك من وقت ما تكتبتيلي البوست ده
هتصدقيني لو قولتلك ماكنتش عارفة أقولك كلام يكفي اللي كتبته ؟!
بس لما بقي الأسبوع ده التدوين من وحي تدوينة ما
إنتِ أول حد جه في بالي
وقررت أفتح البلوج واللي هيجي في دماغي هاكتبه
فـ اعزريني لو ماقدرتش أوفيلك حقك :)

دايماً بتخيلك في عالم خاص بيكِ أوي
بتخيل تفاصيلك اللي شوفتها مرة واحدة من سنة ونص !!
ابتسامتك .. كلامك .. تعبيرات وشك
بحس إن كل حاجة بتعملها أو بتكون حواليكِ فيها تفاصيله منك ومن روحك
بتخيل شكل بيتك شبهك أوي هادي وبسيط ويدخل القلب زيك بالظبط
بتخيل مكتبك اللي بتقعدي تكتبي عليه وتفاصيلك اللي بشوفها في صورك

فاكرة أول مرة شوفتك لما كنت منبهره بيكِ
عارفة الأنبهار ده ليه؟
عشان كنت حاسة إن أنا اللي بتكلم مش إنتِ
لما قولتي إنك بتحبِ يكون في حدود اللي حواليكِ معاكِ ماينفعش يعدوها
وإنك حتي جيرانك ليها حدود بينك وبينهم
حبك للقراءة والكتابة الخالص من أى حاجة إلا الأستمتاع
وحتي تفاصيل من حياتك شبه حياتي 
وحاجات كتير أوي قولتيها ماكنتش متخيله إن حد هيكون بيتبعها في حياته غيرى ! بما إن أنا حاسة إني غريبة شوية يعني
خلتيني أحس إن التصرفات الغريبة اللي بعملها دي من مبادئي وحياتي اللي بحبها
واللي ماينفعش أسمح لحد إنه يغيرها مهما حصل
خلتيني أحس إن لازم أفضل أحافظ علي الحدود اللي بحطها بيني وبين الناس زي ما أنا
وده نفس اللي خلاني في أوقات بكون مضايقة أوي بتكوني من أول الناس إن ماكنتيش أول حد بالفعل أفكر فيه
عشان بحس إني لما أقولك حاجة هابقي بتكلم مع نفسي
من كتر ما أنا شايفة إننا شبه بعض أوي
حتي شبه بعض في نوع الشيكولاته اللي بنحبها والنسكافية ^^

بعد لقائنا الأول واللي لحد دلوقتي الأخير .. كان عندي أمل إني أقابلك تاني
والحمدالله لسه الأمل مش راح يعني :) 
رغم كل الظروف والقلق اللي بيحصلنا كل ما بنحدد نتقابل
وبالرغم من إن المدة ما بين لقائنا ودلوقتي طويلة أوي
وبالرغم من إن مكالماتنا أحيان كتير بتبقي قليلة
بس مين قال إن القرب بالكلام واللقاءات؟!!
طول عمري مقتنعه أن القرب بالروح والقلب قبل أي حاجة
في كتير ناس بتبقي قريبة منك لكن مش بتكون قريبة من قلبك والعكس كمان

لما قولتيلي إنك بتستمدي مني الأصرار إني أوصل للي أنا عايزاة
ماكنتيش عارفة أبداً إن أنا اللي بستمد منك حاجات كتير اوووي يا نيللي
بستمد منك القوة .. ايوة لما بضعف في مواقف بعينها بفتكرك
ومهما قابلت ناس سخيفة في طريق حياتي بعمل مش واخده بالي عشان أقدر أكمل
بستمد منك الأمل .. إن مهما كان حصلنا حاجات تضايق لازم نعديها
بستمد منك التفاؤل .. إن مهما أحلامنا واللي بنتمناه أتاخر مصيره هيجيلنا طالما إنه من نصيبنا

بحب فيكِ إنك دايماً متفائلة أوي بالناس
وده نفس اللي بيخليكِ تتصدمي فيهم بسرعة
يمكن دي الحاجة الوحيدة اللي بطلنا نكون شبه بعض فيها
عشان أنا بطلت اتفاءل بالناس 
وبالتالي بطلت اتصدم !

لسه بحلم معاكِ باليوم اللي هنتقابل فيه سواء في أي مكان
أو حتي في البيت عشان نقف في المطبخ مع بعض :)
ووقتها هابقي جايبالك كيت كات و نسكافية كتير عشان يكفينا
والأكل اللي هنعمله حتي لو وحش هناكله بردو 
ونقعد نكتب حاجة مع بعض وناخد رأي بعض فيها

إنتِ الأولي اللي كنت بفتكرها في دعائي من أصحابي
وبتمنالك نفس اللي بتمناه لنفسي
بتمني ربنا يرزقك بـ يوسف ونور ويكونوا أحسن مما بتتمني كمان

بحمد ربنا إن في وسط ناس كتير أوي عرفتهم وعدوا من حياتي سابوا علامة كويسة أو وحشة
كنتِ إنتِ من الناس اللي سايبة ولسه وهتفضل بتسيب علامة مهمة في حياتي ♥



  • Digg
  • Del.icio.us
  • StumbleUpon
  • Reddit
  • RSS

سوزان عليوان ♥



اتكلمت عن الكُتب والقراءة اللي بعتبرها جزء مهم من حياتي
بس كان لازم أتكلم عن الشخصيات المهمة بالنسبالي في القراءة كمان
 ولذلك هاتكلم عن ... سوزان عليوان ♥



سوزان عليوان بدأت أعرفها أولاً من الجودريدز
وبعدين حَمِلت كل دواوينها وقرأتها
كنت دايماً بحس إنها بتقول كلام مستخبي
هي الوحيدة اللي حساه وفاهماه 
بس أنا بكتفي بأحساسها اللي وصلني من غير ما ابقي فاهمة هي عايزة توصل لأية
وفي كلام بتقولة ببقي موهومة بيه لدرجة إني ممكن أفضل واقفة قدامة نص ساعه
وأعيد قراءة الجُملة مرة واتنين وعشرة
لحد ما أحس إن قلبي وجعني من كتر ما حَس بكلامها !
كلامها كأنه بيحط أيده علي حاجة جوايا 
يا اما بيطبط عليها أو حتي بيصحيها
وعشان كده لما عرفت طريقة أقدر أراسلها بيها اتجننت
وبعتلها فعلاً
عشان أكتشف إنها أنسانه أقل ما يقال عنها إنها رائعة
وكل ما أكلمها بسأل نفسي : هو معقول في حد جميل أوي بالشكل ده !!
ولما أهدتني ديوانها وبعض من البطاقات من رسمها
ماقدرتش غير إني اكبتلها البوست ده 
اللي كلامه حسيته أول ما هديتها زَيِنِت صباحي في يوم من الأيام


لما عرفت إنها هتيجي القاهرة كأني حسيت إن في كنز مسموح لي المسه
يومها وقبل فرحي بـ شهر ونص تقريباً كنت في شقتي أنا ومحمد بنجهزها
ولما حسيت إن الوقت أتاخر ومش هالحق أروح الحفلة قعدت أعيط أوي
حسيت إن فرصة للسعادة بتروح مني ! 
لقاء سوزان عليوان مصدر للسعادة كنت محتاجاه فعلاً
لكن محمد أصر إن مهما الوقت أتاخر لازم هاروح حتي لو أسلم عليها بس
وفعلاً خدنا الطريق جري وتنطيط من هنا لهنا لحد ما وصلنا
روحت وأنا مبهدله ومتربه وعايزة أنام
بس أول ما شوفتها وهي بتقرأ جزء من قصيدة ليها
قلبي رِجِع ضحك من تاني .. ونسيت كل حاجة مريت بيها طول اليوم تضايقني
بوجودها وحضورها وصوتها وضحكتها وروحها المبهجة 
منحتني سعادة فِضلَت معايا لوقت طويل
وحالياً رجعت تاني ابقي مفتقدة إني أقرا كلامها بعد ما خلصت كل دواوينها
وبيتهيألي هابقي طماعة لو قولت كمان إني مفتقدة لقاء زي اللي حصل في صالون ريش ده تاني !
لكن في مسببات السعادة الرائعة بالشكل ده
واجب علي الأنسان إنه يكون طماع


  • Digg
  • Del.icio.us
  • StumbleUpon
  • Reddit
  • RSS

My Favorites :) ..2




 


بيني وبين اللون البمبي عشق لا ينتهي
اللون ده بيريحني جداااااا
وعشان كده البلوج بتاعي كان بنفس اللون 
وهنا حاولت اخليه قريب شوية من اللون ده بردو
ولازم كل حاجة بجيبها يكون فيها اللون ده
اللبس لازم يبقي فيه قطعه علي الأقل بمبي
و شقتي أصريت أن يكون في غرفه منها اللون ده
بحب كمان اعمل خلط بينه وبين لونين تانيين
الأزرق السماوي و الموف الفاتح
الالوان دي لو شوفتها مجتمعه مع بعض
بيحصلي حاله من الأنشكاح غريبة
وكنت في قمة الأنشكاح لما قابلت كذا حد لقبني بملكة الوردي ^^

 


بحب الفيونكات اوي
وبحب أي حاجة فيها فيونكة
حتي لو وحشة بس كفاية إن فيها فيونكاية
رقتها اللي بتضفيها ع الحاجة بتكفي !
 


عندي عشق غريب للبلارينات
اختراع مذهل علي فكرة
مريحة وشكلها بناتي وكيوت خالص
مش برتاح إلا فيها
وممكن أشتري واحدة لمجرد إن شكلها عاجبني 
أو لونها جديد مش لأني عايزاها عشان لبس معين
البلارينات بالنسبة لي عشق لا ينتهي



  • Digg
  • Del.icio.us
  • StumbleUpon
  • Reddit
  • RSS